Փաշինյանը շինարարական կազմակերպություններին մի քանի ժամ տվեց՝ աշխատանքը սկսելու համար

«Քաղաքացիական պայմանագիր» կուսակցության վարչապետի թեկնածու Նիկոլ Փաշինյանն այսօր Ջերմուկում քաղաքացիների հետ հանդիպմանը հայտարարեց, որ շինարարական որոշ կազմակերպություններ քարոզարշավի այս օրերին դուրս չեն գալիս աշխատանքի, որպեսզի չերեւա, թե այդ գործերն արվում են: 

«Ես երեկ Պապիկյանին (Սուրեն Պապիկյան- նախարար-խմբ.) հարցնում եմ՝ բա մենք էս տարի Սյունիքի մարզում 120 կմ ասֆալտ պիտի անենք, հանրապետությունում՝ 400-500 կմ ասֆալտ պիտի անենք, բա ինչի՞ էս աշխատանքները չկան: Պարզվում է՝ այս մրցույթները շահել են քաղաքական որոշ ուժերի հետ կապ ունեցող շինարարական կազմակերպություններ, հիմա իրենք հատուկ նախընտրական շրջանում գործերը չեն անում, որ չերեւա, որ էդ գործերը արվում են… Այ արդեն էդ ընկերությունները նույնպես պրոբլեմ են ունենալու, ես իրենց զգուշացնում եմ, որ ունեն ժամեր՝ տեխնիկան դուրս բերելու եւ աշխատանքները իրականացնելու, եթե ոչ, ընտրություններից հետո պողպատե մանդատի հետ հանդիպելու են, էս ի՞նչ ձեւ է»,- մասնավորապես ասաց Փաշինյանը:

Խոսելով այն մասին, թե ինչո՞ւ են հեղափոխությունից հետո այդ կազմակերպությունների հետ շարունակում աշխատել, ինչո՞ւ չեն նրանց հարցերը լուծել՝ Փաշինյանն ասաց՝ շատ պարզ պատճառով, որ 2018 թ. դրությամբ շատ քիչ են դաշտում եղել մարդիկ, որ էս կապերով կապված չեն:

«Իրենց հարցերը եթե լուծեինք, էդ նշանակում էր՝ 3 տարի ճանապարհ համարյա չէինք կառուցելու: Խնդրում եմ մեր դիլեմաները մի քիչ խորքային նայեք: Այո՛, գիտեինք, որ էդ մարդիկ ինչ-որ պահի խփելու են մեջքից: Կարող էինք հանել մեջտեղից, բայց դա նշանակում է, որ մենք ոչ թե 1600, այլ 160 կմ ճանապարհ կառուցած կլինեինք»,- շարունակեց վարչապետի պաշտոնակատարը:

Նա ընդգծեց, որ ասֆալտի թեմայով առանձին հպարտանալու առիթ ունի, որովհետեւ իր իշխանությունը ճանապարհ է կառուցել մի տարածքում, որը 35 տարի չի ունեցել: 

Խոսքը Վայոց ձորի մարզի Զառիթափ համայնքում գտնվող Խնձորուտ և Նոր Ազնաբերդ բնակավայրերի մասին է: Ըստ Փաշինյանի՝ թեեւ այս երկու համայնքներում ապրում է 650 մարդ, բայց Կառավարությունը 2 մլն 300 հազար դոլար է ծախսել, որպեսզի այդ գյուղեր տանող 14 կմ-ոց ճանապարհը կապիտալ վերանորոգի: Ընդ որում, ճանապարհը կառուցվել է մինչեւ վերջին տունը:

«Սա վերաբերմունք է մարդու նկատմամբ»,- շեշտեց Փաշինյանը՝ հավելելով, որ ոչ մի քաղաքացի չի կարող իրեն անտեսված զգալ, որովհետեւ նա նույնպիսի քաղաքացի է, ինչքան Երեւանի կենտրոնում ապրողը:

Փաշինյանը տեղեկացրեց նաեւ, որ շուտով զարկ են տալու Հյուսիս-հարավ ճանապարհին, կառուցելու են նաեւ Սիսիան-Ագարակ հատվածը: 

Վերջում վարչապետի պաշտոնակատարը ընդգծեց՝ կարեւորը, որ այս ամենը չեն անում միայն նախընտրական շրջանում: