Փետրվարին կձևավորվի աշխատանքային խումբ՝ սահմանադրական փոփոխությունների հարցը քննարկելու. Լիլիթ Մակունց

Կարծում եմ, որ աշխատանքային խումբը կձևավորվի, և նախարարությունը կլինի հնարավորինս ներառական, ընդիմությունից ևս կներգրավվեն: Այս մասին այսօր խորհրդարանում լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը՝ անդրադառնալով առաջիկա սահմանադրական փոփոխություներին:

«Արդարադատության նախարարությունն արդեն տեղեկացրել է, որ փետրվարին ձևավորվելու է աշխատանքային խումբ, որով քննարկելու են այդ թվում սահմանադրական փոփոխություններին առնչվող հարցեր»,- ասաց Մակունցը: Խմբակցության ղեկավարը անդրադարձավ նաև Ստամբուլյան կոնվենցիայի ընդունման հարցին, նշելով, որ որևէ կերպ չի պատրաստվում անդրադառնալ մի փաստաթղթի, որը դեռ չի հայտնվել Ազգային ժողովում: «Ո՛չ երեկ, ո՛չ այսօր այն փաստաթուղթը, որի մասին խոսում եք, խորհրդարանի օրակարգում չկա»,- նշեց նա: