Քնած վիճակում մահակների բազմաթիվ հարվածներ են հասցրել գլխիս, ապա՝ դանակի 11 հարված մարմնիս. Արման Անտոնյան

Երեւանի ավագանու նիստին քաղաքապետ Հայկ Մարությանն ասաց՝ ուզում է ուրախությամբ հայտնել, որ ավագանու «Իմ քայլը» խմբակցության անդամ Արման Անտոնյանը վերադարձել է իրենց շարքերը ու արդեն լավ է:

Հիշեցնենք՝ Արման Անտոնյանը երկար ժամանակ գտնվում էր հիվանդանոցում այն բանից հետո, երբ անհայտ անձինք ներխուժել էին վերջինիս բնակարան եւ դանակի տասնյակ հարվածներ հասցրել նրան: Անտոնյանի վիճակը տեւական ժամանակ գնահատվում էր ծայրահեղ ծանր:

Նա մի քանի բառով անդրադարձավ ամիսներ առաջ կատարվածին: «Բարի ողջույններս ներկաներին եւ բոլորին: Ինչ պետք է ասի վերածնված մի մարդ, որը Աստծո օրհնությամբ ծայրահեղ ծանր վիճակից կարողացավ դուրս գալ եւ օր օրի սկսեց ապաքինվել, ապաքինվել օգոստոսի 1-ին՝ գիշերվա ժամը 1-ին, դիմակավոր թուրք բաշիբոզուկների կողմից իմ նկատմամբ իրականացված մահափորձից: Ինձ երկար հետեւելով, ապա գիշերը ներխուժելով իմ տուն, վնասելով ընտանիքիս անդամներին՝ քնած վիճակում մահակների բազմաթիվ հարվածներ են հասցրել գլխիս, ապա դանակի ավելի քան 11 հարված մարմնիս մասերին»,- կատարվածը ներկայացրեց Անտոնյանը:

Ավագանու անդամը նաեւ շեշտեց՝ թուրք բաշիբոզուկների կողմից իրականացված կյանք խլելու գործողությունը հարիր է միայն թշնամի ազգին: «Երեւանի ավագանու անդամի նկատմամբ մահափորձը, մանավանդ՝ իր մասնագիտական աշխատանքը կատարելու համար, պետության եւ համայնքի շահերը պահելու համար, ուղիղ ոտնձգություն է պետության նկատմամբ: Իմ փոխարեն կարող էր լինել ցանկացած մեկն այս շենքում»,- ասաց Արման Անտոնյանը: