Քոչարյանը դատի է տվել ՀՀ-ին՝ պահանջելով 2 մլն դրամ փոխհատուցում

Մարտի 1-ի գործով ամբաստանյալ Ռոբերտ Քոչարյանը դատի է տվել ՀՀ-ին՝ ի դեմս ֆինանսների նախարարության: Այս մասին տեղեկանում ենք Դատական տեղեկատվական համակարգից: 

Քոչարյանը պահանջում է հաստատել իրավունքի խախտումը և որպես ոչ նյութական վնասի հատուցում 2 մլն դրամ բռնագանձել հօգուտ իրեն: 

Քոչարյանի փաստաբանական թիմի տարածած հաղորդագրությունից տեղեկանում ենք՝ «դատավոր Աննա Դանիբեկյանը  Ռ․ Քոչարյանի անձին վերաբերող բժշկական գաղտնիք պարունակող տեղեկություն է հրապարակել»:

«Առողջական խնդիրների պատճառով Ռոբերտ Քոչարյանը չի կարողացել ներկայանալ ս․թ․ մարտի 10-ին կայացած՝ Երևանի ընդհանուր իրավասության դատարանում քննվող սահմանադրական կարգի ենթադրյալ տապալման գործով դատական նիստին: Փաստաբանները «Էրեբունի» ԲԿ-ից տեղեկանք են ներկայացրել դատարանին, որը դատավոր Աննա Դանիբեկյանը առանց պաշտպանների և Ռոբերտ Քոչարյանի թույլտվության հրապարակել է դռնբաց նիստում»,- ասվում է հաղորդագրության մեջ:

Հայցը մակագրվել է Երևան քաղաքի ընդհանուր իրավասության դատարանի դատավոր Արմենուհի Բադիրյանին: 

Հայցը ներկայացվել է օգոստոսի 19-ին: