Քոչարյանի գործով որոշումը դատախազությունը բողոքարկել է

«Մենք արձանագրել ենք, որ դատարանը կիրառել է Սահմանադրությանը հակասող նորմ, հակափաստարկներ ենք ներկայացրել»,- Ռոբերտ Քոչարյանի և Արմեն Գևորգյանի դեմ հարուցված քրեական գործի՝ այսօր հետաձգված դատական նիստից հետո լրագրողներին ասել է պետական մեղադրող Գևորգ Բաղդասարյանը:

Նա նշել է, որ ՀՀ գլխավոր դատախազությունը բողոքարկել է Մարտի 1-ի գործով Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի նկատմամբ ՀՀ Քրեական օրենսգրքի 300.1 հոդվածի 1-ին մասով քրեական հետապնդումը դադարեցնելու և քրեական գործի վարույթը կարճելու մասին առաջին ատյանի դատարանի որոշումը:

Մեղադրող Բաղդասարյանը նշել է նաև, որ ՍԴ որոշումը դատարանի համար առաջացնում է պարտավորություն քրեական հետապնդումը դադարեցնելու, բայց հենց այդ պարտավորությունը առաջացնող նորմերի սահմանադրականության հետ կապված էլ խնդիր են տեսել, դրա համար էլ դիմել են Սահմանադրական դատարան։