«Քովիդ-19»-ը ազդում է տեսողության վրա. վիրուսով վարակված մարդիկ նաև կուրացել են

Կորոնավիրուսային հիվանդությունը չնայած դեռ լիովին չեն բացահայտել մասնագետները, սակայն նրանք արդեն նշում են, թե ինչ ազդեցություն է այն թողնում մարդկանց տարբեր օրգանների վրա: Մարդու նյարդային համակարգը, հիշողությունը ախտահարելուց բացի, քովիդը բացասական է անդրադառնում նաև տեսողության վրա:

Ս. Վ. Մալայանի անվան ակնաբուժական կենտրոնի աչքի բորբոքային հիվանդությունների բաժանմունքի վարիչ Աննա Հովակիմյանի խոսքով՝ վիրուսով վարակված շատ հիվանդներ դիմում են կենտրոն տեսողական լուրջ խնդիրների ախտահարմամբ: Քովիդի հետևանքով մարդիկ բողոքում են աչքերի արտադրությունից, նույն ինքը շաղկապենաբորբից, աչքերի կոնյուկտիվիդ հիվանդությունից և այլ խնդիրներից:

«Շաղկապենաբորբը, այսինքն՝ աչքերի արտադրությունը քովիդի դեռ մեղմ ախտահարում է, որը բուժվում է 7-14 օրվա ընթացքում: Այդ հիվանդությունը բուժվում է նաև առանց բժշկի դիմելու դեքում: Լուրջ բորբոքումներից են, այսպես կոչված, ուվեյիտները, ակնահատակում առաջացած տրոմբոզները»,- այսօր հրավիրված մամուլի ասուլիսում ասաց նա:

Ըստ նրա՝ կան նաև դեպքեր, երբ «Քովիդ-19»-ը մարդկանց մոտ առաջացնում է կուրության դեպքեր, երբ վիրուսը այնքան է ախտահարում աչքերի անոթները, որ վերականգնել այլևս անհնար է: Եղել և լինում են նաև դեպքեր, երբ մեծահասակները, վարակվելով քովիդով և առողջանալով տանը, ունենում են առաջացած տեսողական խնդիրներ, սակայն ուշ են դիմում բժշկական օգնության: 6 ամիս կամ 1 տարի տանն են մնում և դիմում այն ժամանակ, երբ իրենց ոսպնյակներն արդեն փառ են կապած լինում. կատարախտ է առաջացած լինում:

Մասնագետի խոսքով՝ տեսողական խնդիրներն առաջ են գալիս նաև վիրուսի հետևանքով ստացած բուժման արդյունքում, երբ մարդը ծանր է տանում քովիդը, ունի թոքաբորբ և հոսպիտալացվել է, նրա բուժման մեջ ներառված են նաև հորմոնները, որի երկարատև կիրառման արդյունքում առաջանում է կատարախտ, ներակնային ճնշման բարդացումը, տրոմբոզ: Սակայն, եթե կատարախտ և գլաուկոմա հիվանդությունները կարող են բժշկական միջամտությամբ վերականգնվել, ապա տրոմբոզի հետևանքներն անհնար է վերականգնել:

Ըստ մասնագետների՝ վիրուսը կարողանում է ներթափանցել մարդկանց աչքի մեջ դրանում առկա ռեցեպտների պատճառով: Կալիֆոռնիայի համալսարանի Ջուլս Ստայնի անվան աչքի ինստիտուտի պրոֆեսոր Էնտոնի Ալդավեի խոսքով էլ՝ բացի աչքի բորբոքային հիվանդություններից, քովիդը խոչընդոտներ է առաջացնում նաև աչքի եղջերաթաղանթի փոխպատվաստման դեպքում. «Եղջերաթաղանթի փոխպատվաստման դեպքում պետք է վստահ լինենք՝ արդյոք այդ մարդը վարակված չէ քովիդով կամ շփում չի ունեցել վարակակիր անձի հետ, որպեսզի քովիդն էլ հետը չփոխանցենք: Այդ պատճառով դժվար է ընտրել եղջերաթաղանթը: Ամերիկայում մշակել ենք հատուկ աչքի բանկ, որով փորձում ենք հասկանալ՝ դոնոր հանդիսացող անձը վարակակի՞ր է, շփվե՞լ է քովիդով մարդկանց հետ: Այլ հարց է՝ անձը պատվաստվե՞լ է քովիդի դեմ, թե՞ ոչ»,- ասաց նա:

Ըստ նրա՝ կորոնավիրուսի դեմ պատվաստանյութերը չեն կարող որևէ ազդեցություն ունենալ տեսողության վրա, առաջացնել կուրություն կամ այլ խնդիրներ: Պատվաստանյութի հետևանքով առաջացած խնդիրների ռիսկը ավելի քիչ է, քան քովիդի առաջ բերած խնդիրները: