ԱՄՆ Զինված ուժերի Եվրոպայում նախկին գլխավոր հրամանատար Բեն Հոջեսը կոշտ քննադատության է ենթարկել Դոնալդ Թրամփի որոշումը՝ այլևս չպահանջել Կրեմլից դադարեցնել կրակը Ուկրաինայում և հրաժարվել պատժամիջոցային ճնշումից։ Նրա խոսքերով, նման դիրքորոշումը «լրջորեն կխաթարի վստահությունը Ամերիկայի նախագահի հանդեպ» և կդառնա «ամոթալի ԱՄՆ-ի համար»։ «Ամերիկան չի կարող միայնակ հաղթահարել այս ամենը, մեզ անհրաժեշտ են դաշնակիցներ, և մեր լավագույն դաշնակիցները գտնվում են Եվրոպայում, Կանադայում և Ավստրալիայում։ Եթե Միացյալ Նահանգները հայտարարի, որ սա միայն Եվրոպայի խնդիրն է, իմ կարծիքով ահն դավաճանություն կլինի մեր դաշնակիցների նկատմամբ, ովքեր տասնամյակներ շարունակ մեզ հետ կողք կողքի են եղել», — նշել է Հոջեսը։ Նրա խոսքով, եթե ԱՄՆ-ն իսկապես դուրս գա բանակցային գործընթացից և դադարեցնի Ուկրաինային աջակցելը, ապա Եվրոպան ստիպված կլինի ստանձնել առաջատար դեր։ «Գերմանիան, որպես խոշորագույն և ամենաուժեղ տնտեսություն ունեցող երկիր պետք է ստանձնի առաջնորդությունը։ Կարծում եմ՝ մյուս եվրոպական երկրները սպասում են, թե կկարողանա՞ արդյոք Գերմանիան լավ օրինակ ծառայել», — հավելել է Հոջեսը։ Գեներալի համոզմամբ Ռուսաստանի նպատակները մնում են նույնը՝ ոչնչացնել Ուկրաինան որպես պետություն և քանդել ՆԱՏՕ-ն։ «Եթե Ռուսաստանը հարձակի դաշնակից երկրի վրա, և մենք պատշաճ կերպով չարձագանքենք, դա կարող է դառնալ ողջ դաշինքի ավարտը», — նախազգուշացրել է Հոջեսը։