ԱՄՆ նախագահ Դոնալդ Թրամփի վարչակազմը մեծացնում է ռազմական օգնությունն Ուկրաինային՝ տրամադրելով սպառազինություն, որը հնարավորություն է տալիս հարվածներ հասցնել Ռուսաստանի տարածքի խորքերին։
Այս մասին Fox News-ի եթերում հայտարարել է ՆԱՏՕ-ում ԱՄՆ դեսպան Մեթյու Ուիթաքերը։
«Մենք Ուկրաինային միջոցներ ենք փոխանցում, որոնք թույլ են տալիս ավելի խորը հարվածներ հասցնել։ Եվ, ամենայն հավանականությամբ, ուկրաինացիները կօգտագործեն դրանք»,– նշել է դիվանագետը։
Ուիթաքերի խոսքով՝ մոտ մեկ միլիարդ դոլարի նոր զինամթերքի խմբաքանակն արդեն ուղարկվել է Ուկրաինա։ Բացի այդ, Վաշինգտոնը յուրաքանչյուր ամիս Կիևին տրամադրում է ևս շուրջ մեկ միլիարդ դոլարի մատակարարումներ՝ ՆԱՏՕ-ի դաշնակիցների հաշվին։
Հավելենք, որ Ռուսաստանի Դաշնության զինված ուժերի գլխավոր շտաբի պետ Վալերի Գերասիմովն ամփոփել է գարուն-ամառ ռազմական գործողությունների արդյունքները և հայտնել, որ ռուսական զորքերը շարունակել են առաջ շարժվել Սումիի, Խարկովի և Դնեպրոպետրովսկի մարզերում։ Մարտից ի վեր վերահսկողության տակ է անցել ավելի քան 3,5 հազար քառ. կմ տարածք և 149 բնակավայր։