Ֆրանսիայի նախագահ Էմանուել Մակրոնը հայտարարել է Պաղեստին պետությունը ճանաչելու որոշման մասին։ Ֆեյսբուքյան իր էջում նա հետևյալ գրառումն է արել․

«Մերձավոր Արևելքում արդար և երկարատև խաղաղության պատմական հանձնառությանս հավատարիմ՝ ես որոշել եմ, որ Ֆրանսիան կճանաչի Պաղեստինի պետությունը։ Ես այդ մասին հանդիսավոր հայտարարություն կանեմ ՄԱԿ-ի Գլխավոր վեհաժողովում՝ հաջորդ սեպտեմբերին։

Այսօր անհրաժեշտ է դադարեցնել պատերազմը Գազայում և փրկել քաղաքացիական բնակչությանը։ Խաղաղությունը հնարավոր է։ Անհրաժեշտ է անհապաղ հրադադար, բոլոր պատանդների ազատ արձակում և Գազայի ժողովրդին մեծածավալ մարդասիրական օգնություն։

Մենք պետք է նաև երաշխավորենք ՀԱՄԱՍ-ի ապառազմականացումը, Գազայի անվտանգությունն ու վերականգնումը։ Եվ վերջապես, պետք է կառուցել Պաղեստինի պետությունը՝ ապահովել նրա կենսունակությունը և թույլ տալ, որ այն մասնակցի Մերձավոր Արևելքում բոլորի անվտանգությանը։

Այլընտրանք չկա։

Ֆրանսիացիները խաղաղություն են ցանկանում Մերձավոր Արևելքում։ Մեզանից՝ ֆրանսիացիներիցս, իսրայելցիներից, պաղեստինցիներից և մեր եվրոպացի ու միջազգային գործընկերներից է կախված ապացուցելը, որ դա հնարավոր է։

Հաշվի առնելով Պաղեստինի ինքնավարության նախագահի կողմից ինձ տրված պարտավորությունները, ես նրան գրեցի առաջ շարժվելու իմ վճռականության մասին։ Վստահություն, պարզություն և հավատարմություն։

Մենք կհասնենք խաղաղության»։

Միացյալ Նահանգները վճռականորեն մերժում է Ֆրանսիայի նախագահ Էմանուել Մակրոնի ծրագիրը՝ ՄԱԿ գլխավոր վեհաժողովում պաղեստինյան պետությունը ճանաչելու մասին, X-ի իր միկրոբլոգում գրել է ԱՄՆ պետքարտուղար Մարկո Ռուբիոն։

«Այդ չմտածված որոշումը ծառայում է միայն ՀԱՄԱՍ-ի քարոզչությանը և հարված է հասցնում խաղաղությանը։ Սա ապտակ է հոկտեմբերի 7-ի դեպքերի հետևանքով զոհվածներին»,- գրել է նա։

Իսրայելի վարչապետ Բենիամին Նեթանյահուն ևս Իքսի իր միկրոբլոգում արձագանքել է Ֆրանսիայի նախագահ Էմանուել Մակրոնի՝ Պաղեստինը ճանաչելու որոշմանը։

«Մենք վճռականորեն դատապարտում ենք Ֆրանսիայի նախագահ Էմանուել Մակրոնի որոշումը՝ հոկտեմբերի 7-ի ողբերգությունից հետո Թել-Ավիվի հարևանությամբ պաղեստինյան պետությունը ճանաչելու մասին։ Նման քայլը խրախուսում է ահաբեկչությունը և սպառնում է ևս մեկ իրանական խամաճիկ պետության ստեղծմամբ, այնպես, ինչպես եղավ Գազայի հետ։ Պաղեստինյան պետությունը նման պայմաններում կդառնա հարթակ՝ Իսրայելի ոչնչացման, ոչ թե խաղաղ համակեցության համար։ Եկեք հստակեցնենք․ պաղեստինցիները չեն ձգտում պետություն ունենալ Իսրայելի կողքին, նրանք ձգտում են պետություն ունենալ Իսրայելի փոխարեն»,- գրել է նա։