Հուլիսի 30-ին ԱՄՆ-ն և Հնդկաստանը պատմության մեջ առաջին անգամ գործարկել են եզակի արբանյակ, որը կարող է ֆիքսել Երկրի մակերևույթի ամենանվազ փոփոխությունները՝ լինի դա սառցադաշտերի տեղաշարժ, թե սողանք։ Սարքը նախատեսվում է օգտագործել որպես բնական աղետների վաղ նախազգուշացման համակարգ։
Նախագիծն իրականացվում է ԱՄՆ-ի տիեզերական գործակալության՝ ՆԱՍԱ-ի և Հնդկաստանի տիեզերական հետազոտությունների կազմակերպության՝ ISRO-ի համագործակցությամբ։ Առաքելությունը ստացել է NISAR անվանումը՝ NASA-ISRO Synthetic Aperture Radar, և դարձել է երկու երկրների ամենախոշոր համատեղ տիեզերական նախագիծը։ Ընդհանուր արժեքը կազմում է մոտ 1.2 միլիարդ դոլար։ Արբանյակը գործարկվել է հնդկական հրթիռով Բենգալյան ծոցում գտնվող կղզիներից մեկից և ուղարկվել է ուղեծիր՝ 747 կիլոմետր բարձրության վրա։ Այն յուրաքանչյուր 12 օրը մեկ «կդիտի» Երկրի նույն հատվածները՝ հետևելու անգամ ամենաչնչին փոփոխություններին, որոնք կարող են պայմանավորված լինել երկրաշարժերով, հողային էրոզիայով կամ սառցադաշտերի հալմամբ։
«Սա իսկական գանձ է տիեզերական տեխնոլոգիաների ոլորտում։ Այս ռադիոլոկացիոն արբանյակը կփոխի մեր պատկերացումը Երկրի մասին և կօգնի նախապես կանխատեսել բնական աղետները»,-նշել է ՆԱՍԱ-ի գիտական բաժնի տնօրեն Նիկի Ֆոքսը։
NISAR-ի վրա տեղադրված են երկու հզոր ռադիոլոկացիոն մոդուլներ՝ մեկը մշակված ԱՄՆ-ում, մյուսը՝ Հնդկաստանում։ Դրանք միկրոալիքային ազդանշաններ են ուղարկում Երկիր և չափում արտացոլված ճառագայթման փոփոխությունները՝ կախված մակերևույթի վիճակից։ Արբանյակը կֆիքսի սառցադաշտերի և սառցե վահանակների հալչելը, ստորգետնյա ջրերի շարժը, երկրակեղևում կուտակվող լարվածությունները, որոնք կարող են հանգեցնել երկրաշարժերի, ոչնչացված անտառներն ու ճահիճները, որոնք արտազատում են ջերմոցային գազեր։ Սարքը պետք է լիարժեք շահագործման մեջ մտնի մինչև հոկտեմբերի վերջ՝ տեխնիկական բոլոր գործողությունների ավարտից հետո, ինչպիսիք են չափիչ սարքերի բացումը և կարգավորումը։