Մայիսի 22-ին Հայաստանի պատմության թանգարանի հավաքածուն համալրվել է նոր և հետաքրքիր նմուշներով։ Նվիրատվությունը կատարվել է Անի Արամ Քրիստի Գեոկչյանի (Ani Aram Christie Gueukdjian) կողմից, իսկ նյութերը թանգարան են տեղափոխվել Ջուդ Գալստաունի և Ռուզաննա Տեր-Հովհաննիսյանի շնորհիվ։
Հատկանշական է բժիշկ Արամ Գեոկչյանին պատկանող չորացրած ծաղիկներով ծրարը, որը Անդրանիկ Օզանյանի և Լուիզա-Նվարդ Քյուրքչյանի հարսանեկան ծաղկեփնջից է։ Ծրարի վրա պահպանվել է հենց բժշկի ձեռագիր գրությունը՝ նշումով, որ այն ստացել է Անդրանիկից։ Ծրարը հայտնաբերվել է նրա դստեր՝ Անի Արամ Քրիստի Գեոկչյանի կողմից, երբ վերջինս հոր նվիրած գրքերը փոխանցել էր Լոնդոնի տեղեկատվության և խորհրդատվության հայկական կենտրոնին (CAIA)։
Թանգարանը խորին շնորհակալություն է հայտնում Անի Արամ Քրիստի Գեոկճյանին՝ արժեքավոր նվիրատվության համար, ինչպես նաև Ջուդ Գալստաունին և Ռուզաննա Տեր-Հովհաննիսյանին՝ թանգարանի հավաքածուն հարստացնելու գործում ցուցաբերած աջակցության համար։