Համաձայն «Երևան քաղաքում տեղական ինքնակառավարման մասին» օրենքի 28-րդ հոդվածի 1-ին մասի՝ 2025 թվականի փետրվարի 11-ին՝ ժամը 10:00-ին, գումարվելու է Երևան քաղաքի ավագանու  4-րդ  նստաշրջանի 1-ին նիստը:

Օրակարգում ընդգրկված է Երևան քաղաքի Ավան վարչական շրջանի Ալմա-Աթայի փողոցում գտնվող 2400 քմ ընդհանուր մակերեսով այգին ղազախ բանաստեղծ, ղազախական գրականության հիմնադիր Ա. Կունանբաևի պատվին կոչելու մասին հարցը։

Խոսելով անհրաժեշտության մասին՝ նախագծում նշվում է, որ Ղազախստանի Հանրապետության նախագահի՝ 2024 թ. ապրիլի 14-15- ը Հայաստանի Հանրապետություն կատարած պաշտոնական այցի ընթացքում բարձրագույն մակարդակում ձեռք է բերվել պայմանավորվածություն փոխադարձության սկզբունքի պահպանմամբ երկու երկրների մայրաքաղաքներում ղազախական գրականության հիմնադիր Աբայ Կունանբաևի և հայ գրերի գյուտի հեղինակ Մեսրոպ Մաշտոցի պատվին փողոցի/պուրակի անվանակոչման շուրջ։

Աստանա քաղաքում առկա է Արամ Խաչատրյանի անվան փողոց, իսկ Ալմաթի
քաղաքում՝ Հայկական փողոց: Երևանի Ավան վարչական շրջանում կա Ալմա-Աթայի
փողոց, իսկ Մալաթիա-Սեբաստիա վարչական շրջանում՝ ղազախ գրող Ջամբուլ Ջաբաևի
անվան փողոց:

Բեռլինում, Բուդապեշտում, Ժնևում, Կահիրեում, Մոսկվայում, Փարիզում,
Դելիում, Պեկինում, Թբիլիսիում, Թեհրանում, Ստամբուլում և այլ քաղաքներում կան Աբայի
անվան փողոցներ, պուրակներ և հուշակոթողներ: Ելնելով վերոգրյալից, ինչպես նաև հաշվի առնելով Հայաստան-Ղազախստան երկկողմ հարաբերությունների խորացման առկա միտումները՝ ՀՀ ԱԳ նախարարությունը կարևորում է Երևանում Ա. Կունանբաևի պատվին այգու անվանակոչումը:
Միևնույն ժամանակ, հաշվի առնելով ղազախստանյան կողմի առաջարկության հետ
համադրելիությունն ապահովելու անհրաժեշտությունը, առաջարկում ենք Երևանի
քաղաքապետարանի կողմից քննարկման ներկայացված՝ Ավան վարչական շրջանի Ալմա-Աթայի փողոցում գտնվող 2400 քմ ընդհանուր մակերեսով այգին անվանակոչել Ա. Կունանբաևի պատվին: