Միջազգային գիտնականների խումբը Ատլանտյան օվկիանոսի հյուսիս-արևելյան հատվածում հայտնաբերել է հազարից ավելի տակառ՝ միջուկային թափոններով: Ինչպես հայտնել է ֆրանսիական CNRS հետազոտական կազմակերպության ներկայացուցիչը, արշավախումբը մեկնել է հունիսին Բրեստ նավահանգստից՝ L’Atalante նավով: Նպատակն էր պարզել, թե ինչ վիճակում է օվկիանոս թափված միջուկային աղբը և ինչպես է այն ազդում շրջակա միջավայրի վրա:
Այժմ թափոնների թաղման վայրում աշխատում է 21 հետազոտող: Գիտնականները նախատեսում են մանրամասն քարտեզ կազմել գտնված տակառների տեղակայման վերաբերյալ և վերցնել ջրի, օվկիանոսի հատակի և օրգանիզմների նմուշներ:
Ռադիոակտիվ թափոնները օվկիանոս թափելու պրակտիկան կիրառվել է 1950-ականներից մինչև 1990-ականների սկիզբը: Մինչև 1993 թվականի արգելքը համարվում էր, որ օվկիանոսի խորքը վտանգավոր նյութերի հեռացման անվտանգ վայրն է: Հատկապես ակտիվորեն դա արվել է այն վայրերում, որտեղ հատակը երկրաբանորեն կայուն էր և հեռու ափերից: Միայն Ատլանտյան օվկիանոսի հյուսիս-արևելյան հատվածում, փորձագետների գնահատմամբ, կարող է լինել մինչև 200 հազար տակառ՝ երեքից հինգ հազար մետր խորության վրա: