Բացահայտված է.Ինչպիսի՞ն կլինեն մարդիկ 1000 տարի անց՝ ըստ գիտնականների:
Եթե հետ նայենք մեր նախնիներին, կարող է թվալ, որ մարդիկ հասել են էվոլյուցիայի վերջնական փուլին, սակայն շատ գիտնականներ կարծում են, որ մարդու ներկայիս տեսքն ընդամենը պատմության սկիզբն է։ Տեխնոլոգիաների, տիեզերական ճանապարհորդության և կլիմայական փոփոխությունների շնորհիվ մեր աշխարհը փոփոխվում է աննախադեպ արագությամբ, և փորձագետները համոզված են, որ մարդկությունն էլ կփոխվի դրա հետ միասին։
Այժմ արհեստական բանականությունը (ԱԲ) պատկերացում է տալիս, թե ինչպե՞ս կարող են մարդիկ փոխվել ապագայում։ Google-ի ImageFX ԱԲ-ով MailOnline-ը օգտագործել է առաջատար գիտնականների կանխատեսումները՝ պատկերացնելու համար, թե ինչպե՞ս կարող է զարգանալ մարդկային տեսքը։
Մարդիկ ավելի նույնանման տեսք կունենան․ Փորձագետների կարծիքով՝ ապագայում մարդիկ ավելի շատ նույնանման տեսք կունենան։ Նրանք կանխատեսում են, որ միջին մարդն ավելի մուգ մաշկ կունենա և նման կլինի այսօր Մավրիկիոսում կամ Բրազիլիայում ապրող մարդկանց։ Բացի այդ, լավ նորություն․ 3025 թվականի մարդիկ կարող են լինել ավելի գրավիչ, քան մենք այսօր։
Մարդիկ կդառնան ավելի ցածրահասակ․ Ժամանակակից բժշկության շնորհիվ այսօր շատ մարդիկ ապրում են այնքան, որ կարողանան երեխաներ ունենալ։ Սա նշանակում է, որ այլ գործոններ կսկսեն ազդել գեների տարածման վրա։ Գենետիկ, պրոֆեսոր Մարկ Թոմասը MailOnline-ին ասել է․«Անցյալում էվոլյուցիան աշխատում էր այն սկզբունքով, որ որոշ երեխաներ չէին կարողանում գոյատևել։ Բայց էվոլյուցիան ազդում է նաև պտղաբերության վրա՝ կախված նրանից, թե քանի երեխա է ծնվում»։
Տեխնոլոգիան և տիեզերքը․ Այլ ուսումնասիրություններ ենթադրում են, որ տեխնոլոգիայի լայնածավալ օգտագործումը կարող է հանգեցնել ոչ գենետիկ փոփոխությունների։ Օրինակ՝ մարդիկ կարող են ձեռք բերել ավելի արտահայտված կռացած կեցվածք, քանի որ նրանք ամբողջ օրը նայում են էկրաններին։ Բացի այդ, մշտապես հեռախոս օգտագործելու հետևանքով ձեռքերը կարող են դառնալ թեքված և չափազանց զարգացած։
Թերի քնի ազդեցությունը․ Քնի մասնագետ Դոկտոր Սոֆի Բոստոկի կանխատեսումների համաձայն՝ քնի պակասը կարող է լուրջ փոփոխություններ առաջացնել մարդու մարմնում։ Տեխնոլոգիաների և սոցիալական մեդիայի օգտագործման աճի պատճառով ավելի շատ մարդիկ կարող են քնել օրական 6 ժամ կամ ավելի քիչ։ 25 տարի անց միջին բրիտանացին կարող է ունենալ քրոնիկ մեջքի ցավ, մազաթափություն, կախված մաշկ, ուռած ոտքեր և կարմրած, պարկանման աչքեր։ Բացի այդ, նրանց ձեռքի և ոտքերի մկանները կնոսրանան, իսկ թույլ իմունային համակարգի պատճառով նրանք ավելի հաճախ կվարակվեն գրիպով։ Սակայն այս փոփոխությունները գենետիկ մակարդակում չեն ամրապնդվի, քանի որ դրանք էվոլյուցիոն առավելություն չեն ապահովում։
Մարդկությունը կարող է բաժանվել՝ հարմարվելով Տիեզերքին․Եթե մարդկության մի մասը տեղափոխվի Տիեզերք՝ հնարավոր է, նրանք աստիճանաբար էվոլյուցիայի ենթարկվեն՝ տարբերվելով Երկրի վրա մնացած մարդկանցից։ ԱՄՆ Վիսկոնսին-Մեդիսոնի համալսարանի մարդաբան Դոկտոր Ջոն Հոքսը MailOnline-ին ասել է․«Երկրի վրա մարդկային բնակչությունը շատ մեծ և բազմազան է, սակայն երկարաժամկետ տիեզերական ճանապարհորդությունը կարող է ստեղծել փոքր, առանձին խմբեր, որոնք կմնան մեկուսացված հազարավոր տարիներ»։Հնարավոր է, որ հարյուրամյակներ անց Տիեզերքում ապրող մարդիկ այնքան փոփոխվեն, որ նույնիսկ նոր կենսաբանական տեսակ ձևավորվի։
Ինչպե՞ս կփոխվի մարդը Մարսի վրա․ Հարմարվելու համար մարդիկ կարող են դառնալ ավելի բարձրահասակ, քանի որ թույլ ձգողականության պայմաններում ողնաշարը երկարում է։ Կարող են ստանալ ավելի երկար ձեռքեր, որոնք կօգնեն նրանց աշխատել ցածր ձգողականության միջավայրում։ Աչքերը կմեծանան և կդառնան ավելի զգայուն, որպեսզի տեսողությունը հարմարվի թույլ լուսավորությանը։ Ավելին, տեխնոլոգիաների զարգացման շնորհիվ մարդու տեսողությունը կարող է ուժեղացվել արհեստական բարելավումներով, ինչը թույլ կտա մարդկանց հարմարվել մթությանը կամ այլ էկզոտիկ պայմաններին։
Եզրակացություն․ Մարդկության ապագան կախված կլինի տեխնոլոգիաներից, միջավայրի փոփոխություններից։ Թե ինչպե՞ս կփոխվի մեր մարմինը, կախված կլինի նրանից, թե որտե՞ղ և ինչպե՞ս կապրենք։