Լոնդոնում թագավոր Չարլզի տարեդարձի առթիվ հայտարարված պատվավոր պարգևների ցուցակում Դևիդ Բեքհեմն արժանացել է ասպետի տիտղոսի։ Նրա հետ նույն պարգևին է արժանացել դերասան Գարի Օլդմանը, իսկ քանդակագործ Էնթոնի Գորմլին դարձել է «Պատվո ընկերության» անդամ։
50-ամյա Բեքհեմը ֆուտբոլային կարիերան սկսել է «Մանչեսթեր Յունայթեդում»՝ 1993 թվականին։ Ակումբում անցկացրած տարիներին նա մասնակցել է շուրջ 400 խաղի՝ նվաճելով բազմաթիվ տիտղոսներ, այդ թվում՝ 6 անգամ դարձել Անգլիայի չեմպիոն, հաղթել Անգլիայի գավաթը և Չեմպիոնների լիգան։
Հետագայում Բեքհեմը հանդես է եկել «Ռեալ Մադրիդի», «Լոս Անջելես Գալաքսիի», «Միլանի» և ՊՍԺ-ի կազմում։ Նա եղել է Անգլիայի հավաքականի ավագը, ընդհանուր առմամբ անցկացրել 115 խաղ և խփել 17 գոլ։
Ավելի վաղ գրել էինք, որ Անգլիական ֆուտբոլի լեգենդ, կիսապաշտպան Դևիդ Բեքհեմը ասպետի կոչում կստանա: Այս մասին հայտնում են The Times -ն ու BBC Sport-ը։
Դեյվիդ Բեքհեմի անունը կներառվի պարգևատրման ցանկում, որը պաշտոնապես կհրապարակվի հունիսի կեսերին՝ Մեծ Բրիտանիայի թագավոր Չարլզ III-ի պաշտոնական ծննդյան օրվա կապակցությամբ (որը սովորաբար չի համընկնում իր իրական ծննդյան օրվա հետ):
Այսպիսով, Բեքհեմը ստանալով ասպետի կոչում՝ կդառնա Սըր Դեյվիդ, իսկ նրա կինը՝ Spice Girls խմբի նախկին մասնակից Վիկտորիան, կկրի լեդի տիտղոսը: