Ֆրանսիայի վարչապետ Ֆրանսուա Բայրուն առաջարկել է 2026 թվականի համար ծախսերի լայնածավալ սառեցում կատարել և չեղարկել երկու ազգային տոն՝ դեֆիցիտը կրճատելու համար։
Բայրուն ներկայացրել է 2026 թվականի բյուջեի ծրագիրը, որը ներառում է հարկերի բարձրացում և ծախսերի կրճատում՝ 44 միլիարդ եվրոյով, ներառյալ կենսաթոշակների և սոցիալական նպաստների կրճատումները, ինչպես նաև հարուստների կողմից «համերաշխության ներդրումը», որի չափը դեռ հստակեցված չէ։
«Սա մեր ճշմարտության պահն է.... Մենք կախված ենք դարձել պետական ծախսերից», - մամուլի ասուլիսում ասել է Բայրուն՝ զգուշացնելով, որ Ֆրանսիան կարող է բախվել պարտքային ճգնաժամի, ինչպիսին եղել է Հունաստանում 2008 թվականին։
Վարչապետի կարծիքով՝ ֆրանսիացիները պետք է ավելին անեն տնտեսական աճը խթանելու համար։ Նա ասել է, որ Զատկին հաջորդող երկուշաբթի օրը և մայիսի 8-ին Եվրոպայում հաղթանակի օրվա առթիվ հանգստյան օրերի չեղարկումը կապահովի 4,2 միլիարդ եվրոյի եկամուտ։ Ֆրանսիան տարեկան ունի 11 պետական տոն, իսկ օրինակ Մեծ Բրիտանիան՝ ութ։
Բայրուն նաև առաջարկում է կրճատել գործազրկության նպաստները։
ԵՄ վիճակագրության գրասենյակի տվյալներով՝ Ֆրանսիայի բյուջեի դեֆիցիտը 2024 թվականի վերջին հասել է ՀՆԱ-ի 5,8%-ին, որը Եվրոպական միության վատագույն ցուցանիշներից մեկն է՝ Ռումինիայից և Լեհաստանից հետո։ Բայրուի բյուջեի նախագիծը, որը պաշտոնապես խորհրդարանին կներկայացվի աշնանը, նպատակ ունի մինչև 2026 թվականի վերջը դեֆիցիտը կրճատել՝ հասցնելով ՀՆԱ-ի մինչև 4,6%-ի, իսկ կառավարությունը ցանկանում է հասնել ՀՆԱ-ի 3%-ի մինչև 2029 թվականի վերջը։