Բրազիլիայի նախկին նախագահ Ժաիր Բոլսոնարուն դատապարտվել է 27 տարվա ազատազրկման։ Արդեն հինգ դատավորներից չորսը որոշմանը կողմ են քվեարկել։
Ներկայումս Բոլսոնարուի նկատմմաբ կիրառվել է տնային կալանք։
Նրա փաստաբանները խոստանում են բողոքարկել դատավճիռը, այդ թվում՝ միջազգային մակարդակով։
Նախկին նախագահի դեմ առաջադրված են ծանրագույն մեղադրանքներ։ Նա մեղավոր է ճանաչվել ոչ միայն պետական հեղաշրջման փորձի, այլև «ժողովրդավարության դեմ ոտնձգության» և կազմակերպված հանցավոր խմբի կազմում մասնակցության մեջ։
Քննությունը պնդում է, որ 2022 թվականի ընտրություններում պարտվելուց հետո Բոլսոնարուն փորձել է խափանել իշխանության փոխանցումը Լուիս Ինասիու Լուլա դա Սիլվային։ Իսկ 2023 թվականի հունվարին Բոլսոնարուի կողմնակիցները գրոհել էին մայրաքաղաքի կառավարական շենքերը՝ պահանջելով զինվորական միջամտություն։
Բոլսոնարուի դեմ ընթացող դատավարությունը նաև միջազգային արձագանք է ստացել։ ԱՄՆ նախագահ Դոնալդ Թրամփը բազմիցս աջակցել է իր բրազիլացի դաշնակցին և դատավճիռը որակել «շատ անսպասելի»։ ԱՄՆ ներկայիս պետքարտուղար Մարկո Ռուբիոն X հարթակում գրել է, որ Վճռաբեկ դատարանի որոշումը «անարդարացի» է և Վաշինգտոնը «պատշաճ կերպով կարձագանքի այս վհուկների որսին»։