Լոնդոնի տնտեսագիտական դպրոցի և Յորքի համալսարանի գիտնականները պարզել են, որ Երկրի վրա հայտնվել են տարվա երկու նոր եղանակներ։ Նրանք ուսումնասիրել են սեզոնային փոփոխությունները աշխարհի տարբեր հատվածներում, գրում է Live Science-ը։
Գիտնականների տվյալներով՝ մարդը կտրուկ փոխել է Երկրի բնական ռիթմը։ Դա հանգեցրել է նոր եղանակների՝ մառախլապատ (ծխային) և աղբի եղանակների առաջացմանը։
Մառախլապատ եղանակն ամեն տարի դիտվում է Հարավարևելյան Ասիայի որոշ հատվածներում, երբ Ինդոնեզիայում և Մալայզիայում սկսում են այրել տորֆի տարածքները, իսկ Հնդկաստանում՝ բերքի մնացորդները։
Աղբի եղանակը, որը դիտվում է դեկտեմբերից մինչև մարտ, առավելապես նկատվում է Բալիում, երբ մուսսոնային քամիներն ու օվկիանոսային հոսանքներն ափ են դուրս բերում տոննաներով պլաստիկ։ Միայն 2025 թվականին, երեք ամսվա ընթացքում, ափամերձ գոտում հավաքվել է ավելի քան 3000 տոննա աղբ։ Նման երևույթներ արձանագրվել են նաև Ֆիլիպիններում, Թաիլանդում և ԱՄՆ-ում։
Գիտնականները նաև պնդում են, որ ավանդական եղանակները աստիճանաբար անհետանում են։ Օրինակ՝ Ալպերում ձմեռը կարճանում է, և ձյան քանակը զգալիորեն նվազում է։ Բացի այդ, սեզոններն ավելի հաճախ են ուղեկցվում ծայրահեղ եղանակային պայմաններով։