Իտալիայի Կապրի հանգստյան քաղաքում կողոպտել են Մեծ Բրիտանիայի Լորդերի պալատի անդամին՝ 65-ամյա Արու Դարզիին։ Ինչպես հաղորդում է Il Mattino թերթը, անհայտ անձինք նկատել են բարոն Դարզիի թանկարժեք ժամացույցը և պարզապես պոկել այն նրա ձեռքից՝ դիմելով փախուստի։ Խոսքը Richard Mille RM 07 մոդելի ժամացույցի մասին, որի արժեքը մոտ 300 հազար եվրո է։
Կողոպուտը տեղի է ունեցել այն պահին, երբ Դարզին զբոսանավից իջել է ափ, որտեղ նա հանգստանում էր ընկերների հետ։ Ոստիկանության տվյալներով՝ հարձակվողները հայտնվել են տեսանկարահանման սարքերի կադրերում։ Գողությունից հետո նրանց տեսել են՝ ինչպես են փախչում Կապրիի նեղ փողոցներով, իսկ հետո՝ մոտորանավակով հեռանում կղզուց։
Կապրիի քաղաքապետ Պաոլո Ֆալկոն հայտարարել է, որ կողոպուտն ամենայն հավանականությամբ նախօրոք պլանավորված է եղել։ Նա ընդգծել է, որ նման հանցագործություններ շատ հազվադեպ են տեղի ունենում կղզում և խոստացել է խստացնել անվտանգության միջոցները։
«Սա իսկապես վրդովեցուցիչ դեպք է, որն արդեն տարիներ շարունակ չէր պատահել», — հավելել է Ֆալկոն։
Ինքը՝ լորդ Արու Դարզին, չի տուժել։ Նա հայտնի վիրաբույժ և պրոֆեսոր է, 2007 թվականին ստացել է Դենհեմի բարոնի տիտղոսը և զբաղեցրել է Մեծ Բրիտանիայի առողջապահության նախարարի պաշտոնը։