Դեմի Մուրը և Բրյուս Ուիլիսը միշտ էլ եղել են գեղեցիկ զույգ, որին շատերը նախանձել են Հոլիվուդում։ Եվ նույնիսկ ամուսնալուծությունից քսանհինգ տարի անց նախկին կինը շարունակում է ջերմորեն վերաբերվել դերասանին։ Վերջին հարցազրույցում Մուրը պատմել է, որ մշտապես այցելում է Բրյուսին։ 69-ամյա արտիստն արդեն երկու տարի պայքարում է ճակատաքունքային թուլամտության` դեմենցիայի դեմ։ 2022 թվականի գարնանը հիվանդության պատճառով Ուիլիսը թողել է դերասանական կարիերան, քանի որ նրա խոսքային խանգարումը սկսել է արագ զարգանալ։ 62-ամյա Մուրը խոստովանել է, որ ամեն շաբաթ այցելում է նախկին ամուսնուն և պահպանում է ընկերական հարաբերություններ նրա երկրորդ կնոջ՝ Էմմա Հեմինգի հետ։ Մենք միշտ ընտանիք կմնանք, պարզապես այլ ձևով։ Ես գալիս եմ, որովհետև փորձում եմ աջակցել այն մարդկանց, ում սիրում եմ,-ասել է դերասանուհին Variety-ին տված հարցազրույցում։ Մուրը և Ուիլիսը միասին են եղել 1989-2000 թվականներին։ Նրանց ամուսնությունից ծնվել են երեք դուստրեր՝ Ռումերը, Սքաութը և Թալուլան։ Նրանք արդեն բոլորը 30-ն անց են։ Երկրորդ կինը՝ Էմմա Հեմինգը, Բրյուսին երկու դուստր է պարգևել՝ 12-ամյա Մեյբլը և 10-ամյա Էվելինը։ -Կյանք կա ամուսնալուծությունից հետո։ Կան եղանակներ, թե ինչպես կարելի է մնալ ընկերական և սիրող ծնողներ,-ավելացրել է Դեմի Մուրը։ Օրեր առաջ աստղային զույգի ավագ դուստրը՝ Ռումեր Ուիլիսը, բրիտանական Loose Women թոք-շոուի ընթացքում պատմել է հոր առողջական վիճակի մասին։ Լուրեր են շրջանառվում, որ դերասանը լիովին կորցրել է խոսելու ունակությունը։ Սակայն Ռումերի խոսքով՝ նրա վիճակը կայուն է, և որևէ լուրջ վատթարացում չի նկատվում։ -Մեր ընտանիքը հիմա շատ ավելի միավորված է։ Մենք իսկապես միասնական ենք,-ասել է Ռումերը։ Նրա խոսքով՝ Լոս Անջելեսում այս տարվա հունվարին բռնկված հրդեհները ևս ավելի են միավորել ընտանիքը։ Բրյուս Ուիլիսի երկրորդ կինը՝ Էմմա Հեմինգը, լրագրողներին պատմել է, որ երբեք չի փորձել թաքցնել դուստրերից հոր առողջական վիճակը։ -Նրանք մեծանում էին, երբ տարիների ընթացքում Բրյուսը դանդաղորեն կորցնում էր ուժերը։ Ցավոք, ճակատաքունքային թուլամտությունը` դեմենցիան, դեռևս անբուժելի է։ Վաղ փուլերում այն առաջացնում է վարքագծային փոփոխություններ, խոսքի խանգարումներ, դժվարացնում սովորական գործողությունները, ինչպես նաև նվազեցնում է էմոցիաների վերահսկումը։ Որոշ դեպքերում հիվանդը կարող է ընկղմվել ապատիայի մեջ։ Սակայն մտերիմների ուշադրությունն ու մասնագետների աջակցությունը կարող են դանդաղեցնել հիվանդության զարգացումը։