Լոնդոնի համալսարանական քոլեջի գիտնականների նոր ուսումնասիրությունը վերանայել է մարդկանց մոտ կրկնվող տենդի հայտնվելու ժամանակագրությունը: Աշխատությունը հրապարակվել է Science ամսագրում:
Գիտնականների խոսքով՝ հիվանդությունը սկսել է տարածվել մոտ 5000 տարի առաջ, այլ ոչ թե 11000 տարի առաջ, ինչպես նախկինում ենթադրվում էր և կապվում էր գյուղատնտեսության զարգացման հետ: Հնագույն ԴՆԹ-ն վերլուծելով՝ հետազոտողները վերականգնել են Borrelia recurrentis բակտերիայի չորս գենոմներ՝ 600-ից 2300 տարեկան, որոնք հայտնաբերվել են Մեծ Բրիտանիայում գտնված կմախքների ատամներում:
Արդյունքները ցույց են տվել, որ հարուցիչը հարմարվել է մարդու ոջիլների միջոցով փոխանցվելուն՝ մոտավորապես բրոնզի դարում: Հետազոտությանը չմասնակցած Կիլի համալսարանի գենետիկ Բեն Կրաուզե-Կիորան բարձր է գնահատել աշխատանքը՝ նշելով դրա խորը վերլուծությունը պաթոգենի էվոլյուցիայի վերաբերյալ:
Արխեոգենետիկ Պուջա Սվալին կապում է տենդի տարածումը բրդե հագուստի տարածման և մարդկանց՝ ընտանի կենդանիների հետ ավելի սերտ շփման հետ:
Բացի այդ, ուսումնասիրությունը ցույց է տվել, որ նույն ժամանակահատվածում աճել են բորոտության և ժանտախտի դեպքերը, ինչը հակասում է ժամանակի ընթացքում պաթոգենների թուլանալու տարածված կարծիքին: