«Գեղամ Մանուկյանն իր ելույթում ասաց, թե Արարատը ՀՀ հավաքականի մարզաշապիկից թյուրիմացաբար է անհետացել։ Ո՞նց կարող է։ Այսինքն, դուք Արարատը նսեմացնում եք և նսեմացրել եք ու համարել եք, որ Արարատին կարելի է թյուրիմացաբար դուրս թողնել Հայաստանի հավաքականի մարզաշապիկից։ Հիմա մե՞նք ենք Արարատը ուրանում, թե՞ դուք»,-ԱԺ-ում ելույթի ժամանակ խոսքն ուղղելով Գեղամ Մանուկյանին՝ ասաց ՔՊ խմբակցության ղեկավար Հայկ Կոնջորյանը՝ շարունակելով․
«Նման թյուրիմացություններ փաստորեն դաշնակցության մոտ հաճախ են լինում։ Երևի այդպես թյուրիմացաբար կոալիցիայի մեջ մտաք երիտթուրքերի հետ, հետո Հանրապետականների հետ։ Ցեղասպանությունից ընդամենը երեք տարի անց Դաշնակցությունը գնում, Թուրքիայի հետ պայմանագիր է կնքում բարեկամության մասին։ Փաստորեն դա չեք համարում ուրացում, իսկ հիմա՝ 110 տարի անց, երեսպաշտորեն նախագիծ եք ուզում բերել նախագիծ՝ Ցեղասպանության ուրացումը քրեականացնելու համար»։
Ապա նիստը վարող ԱԺ նախագահ Ալեն Սիմոնյանի եւ «Հայաստան» խմբակցության դաշնակցական անդամների միջեւ լեզվակռիվ սկսվեց: Ալեն Սիմոնյանն ասաց. «Դե դուք ձեր մեջ ներքին վեճ ունեք, դաշնակցականներով»:
Երբ տեղից փորձեցին հակադարձել, ԱԺ նախագահն ասաց, որ իրավունք չունեն խոսելու. «Չեք կարող, տեղից անընդհատ խոսում եք: Նստեք, դու էլ նստած մնա, մանկապարտեզ չի, հանգիստ: Դու-ով խոսա, երիտասարդ, լսո՞ւմ ես, ինչ ձեւ խոսում է, նույն ձեւ ստանում է պատասխանը: Մնացեք օրենքով սահմանված չափերի մեջ»,-ասաց Ալեն Սիմոնյանը:
Դահլիճում իրավիճակը լարվեց, իրար սկսեցին հրմշտել ՔՊ-ից Վահե Ղալումյանն ու «Հայաստան» խմբակցության պատգամավորները: