Գևորգ Գրիգորյանը, որը ԱՄՆ–ում հաջողակ գործարար ու անվանի ճարտարապետ է, որոշել է մասնակցել Գլենդելի քաղաքային խորհրդի առաջիկա ընտրություններին։ Նա պաշտոնապես հաստատեց իր թեկնածությունը՝ ներկայացնելով միասնության և առաջընթացի իր տեսլականը։
Հիշեցնենք՝ ընտրությունները տեղի են ունենալու 2026 թ. հունիսի 2-ին։ Գևորգ Գրիգորյանը Գլենդելի հանրության կողմից ճանաչվել է նախևառաջ իր գերժամանակակից շինարարական նախագծերով, որոնք դարձել են մնայուն արժեքներ և համայնքային կյանքի անբաժանելի մաս։ Նա Հարավային Կալիֆորնիայում կարևոր ներդրում է ունեցել ինչպես մասնավոր, այնպես էլ հանրային տարածքների կառուցման և զարգացման գործում՝ աչքի ընկնելով իր նորարարական լուծումներով և տարբերվող մոտեցումներով։ Նրա նախագծերը համադրում են հարմարավետությունն ու ֆունկցիոնալությունը՝ հարուստ մշակութային ժառանգության արժեվորմամբ ու կիրառմամբ՝ ձևավորելով ժամանակակից և մարդակենտրոն միջավայր։
Բացի մասնագիտական հաջողություններից, Գրիգորյանը երկար տարիներ կանգնած է եղել Գլենդելի հայկական համայնքի կողքին՝ աջակցելով բնակիչների քաղաքացիական ակտիվությանն ու ներառականությանը։ «Գլենդելը արժանի է քաղաքային խորհրդի, որը ոչ միայն պատասխանատու կերպով կղեկավարի զարգացման գործընթացները, այլև կհաղորդի վստահություն, միասնություն և հնարավորություններ յուրաքանչյուր ընտանիքի համար։ Ես առաջադրվում եմ՝ քաղաքին բերելու թարմ տեսլական՝ հիմնված առաջընթացի, հաշվետվողականության և թափանցիկության վրա։ Որպես մարդ, որը կյանքը նվիրել է ստեղծելուն և կառուցելուն, հավատում եմ, որ առաջնորդությունը հիմնասյուներ դնելու արվեստն է՝ ապագա սերունդների համար», – նշեց Գրիգորյանը։