Կասսելի շրջանի ավտոճանապարհի խոշորածավալ ծրագիրն արդեն դարձել է գերմանական բյուրոկրատական աբսուրդի խորհրդանիշ։ Ընդամենը 11 կիլոմետրանոց ճանապարհի հատվածը ավելի քան 30 տարի է` կառուցվում է։ Թեև ծրագիրը հաստատվել է դեռևս 2006 թվականին, նախագծման սխալների, բողոքների և բնության պահպանման պատճառով շինարարության մեկնարկը հետաձգվել է առնվազն մինչև 2031 թվականը, իսկ ավարտը սպասվում է ոչ շուտ, քան 2036–2037 թվականներին։ Խնդիրները սկսվել են նրանից, որ իշխանությունները շտապել են կանգ առնել միակ երթուղու վրա՝ առանց այլընտրանքները մանրակրկիտ ուսումնասիրելու։ Այդ պատճառով Գերմանիայի տրանսպորտի նախարարությունը մինչ օրս ստիպված է «լրամշակել նախագիծը, որպեսզի այն դիմանա հնարավոր իրավական քննությանը»։ Դրա համար պաշտոնյաները, մասնավորապես, պետք է մեկ տարի հետևեն հնարավոր երթուղու երկայնքով բնակվող չղջիկների, տրիտոնների և այլ կենդանիների պոպուլյացիաներին։ Նախագծի արժեքն արդեն հիմա զարմացնում է․ 70 կիլոմետր ավտոճանապարհը (որից 11-ը դեռևս կառուցված չէ) արժենալու է 3 միլիարդ եվրո՝ դառնալով Գերմանիայի ամենաթանկ ճանապարհային հատվածը։ Սկզբնապես այս հատվածի կառուցումը պլանավորվել է դեռ նացիստական Գերմանիայի օրոք, սակայն Երկրորդ համաշխարհային պատերազմի պատճառով այն այդպես էլ չի ավարտվել։ Այդ ժամանակներից մնացել է միայն մի կամուրջ, որը անտառի մեջտեղում է։