Եվրասիական տնտեսական հանձնաժողովը (ԵԱՏՀ) արձագանքել է վերջին շրջանում ստեղծված իրավիճակին, որը կապված է Հայաստանի և ԵԱՏՄ անդամ այլ երկրների բեռնատարների վարորդների՝ Ռուսաստանում բեռնափոխադրումներ իրականացնելու դժվարությունների հետ։
Այս պահին հանձնաժողովում քննարկվում է հնարավորությունը՝ վերացնելու միգրացիոն սահմանափակումները այն վարորդների համար, որոնք ԵԱՏՄ անդամ պետություններից են և զբաղվում են միջազգային ավտոբեռնափոխադրումներով։ Խոսքը մասնավորապես վերաբերում է ՌԴ-ում ժամանակավոր ժամանման (մնալու) ժամկետները սահմանող նոր կանոններին, որոնք խնդիրներ են առաջացրել վարորդների համար։
ԵԱՏՀ-ն վստահեցնում է, որ իր լիազորությունների և իրավասությունների շրջանակում անում է ամեն անհրաժեշտը՝ հարցը կարգավորելու և բեռնափոխադրումների անխափան ընթացքն ապահովելու համար։
Հիշեցնենք, որ եռնատարների վարորդները բողոքի ակցիաներ են իրականացնում Կառավարության շենքի առջև՝ պահանջելով ռուսական կողմի հետ բանակցել՝ այնտեղ գտնվելու 90 օրվա արգելքը փոփոխելու համար։
«2025թ․ հունվարի 1-ից ՌԴ օրենսդրության փոփոխություններից մի կետ շատ ուղիղ անդրադառնում է նաև Հայաստանից ուղևորաբեռնափոխադրում իրականացնող վարորդների վրա։ Դա ՌԴ-ում օտարերկրյա քաղաքացիների իրավական կարգավիճակի մասին թիվ 115 ֆեդերալ օրենքի փոփոխությունն է, որն ուժի մեջ է մտել և հունվարի 1-ից ոչ վիզային ռեժիմի երկրների քաղաքացիները, որոնք ՌԴ մուտք են գործում ոչ աշխատելու նպատակով և միգրացիոն քարտում «այցի նպատակ» բաժնում աշխատանք չեն նշում, նրանք նախկին տարվա յուրաքանչյուր 180 օրվա մեջ 90 օր գտնվելու փոխարեն օրացուցային տարում կարող են գումարային 90 օր գտնվել։ Այսինքն, երկու անգամ ժամկետը կրճատվել է։ Սա վերաբերում է նաև օդաչուներին, բորտուղեկցորդներին, գնացքավարները և այլն»,-մամուլի ասուլիսի ժամանակ ասել էր «Հայկական Կարիտաս» կազմակերպության միգրացիոն ծրագրի փորձագետ Տաթևիկ Բեժանյանը։
Նրա փոխանցմամբ՝ փետրվարին ուժի մեջ է մտել արտաքսման մասին օրենքը։
«Մինչև ապրիլի 30-ը անձանց թույլատրված էր կարգավորել փաստաթղթերը՝ առանց ՌԴ-ից դուրս գալու և օրինականացնել իրենց գտնվելը ՌԴ տարածքում։ Հետո ժամկետը երկարաձգվեց մինչև սեպտեմբերի 10-ը, որից հետո ոստիկանությունը հետևողականորեն ստուգում է բոլորի անձնագրերը և հաշվոմ օրերը, թե որքան են ավելի մնացել օրինական թույլատրված 90 օրից։ Եթե 90 օրից ավելի է մնացել՝ տրվում է մուտքի արգելք՝ 3 տարի ժամկետով։ 180-270 օր ավելի գտնվելու պարագայում մուտքի արգելք՝ 5 տարի ժամկետով, իսկ 270 օրվանից ավելի գտնվելու պարագայում՝ 10 տարի ժամկետով»,-մանրամասնել էր փորձագետը։