Սեպտեմբերի 17-23-ը Երևանում երկրորդ անգամ տեղի կունենա «Yerevan Music Week» միջազգային երաժշտական փառատոն-համաժողովը։ Այս տարի փառատոնը կհյուրընկալի շուրջ 70 երաժիշտների եւ բանախոսների աշխարհի տարբեր երկրներից՝ ստեղծելով ինքնատիպ հարթակ երաժշտական փորձի փոխանակման եւ միջազգային համագործակցության համար։
«Music of Armenia» մշակութային հասարակական կազմակերպության և «Yerevan Music Week»-ի հիմնադիր տնօրեն Հասմիկ Մովսիսյանի փոխանցմամբ՝ Yerevan Music Week-ն ընդգրկված է Եվրոպական փառատոնների ասոցիացիայի (EFA) փառատոնների ցանկում։
«Երբ այցելում ենք Եվրոպական փառատոնների ասոցիացիայի կայք ու տեսնում ենք, թե այս տարի սեպտեմբերին կամ մոտ օրերին ի՞նչ իրադարձություններ են տեղի ունենում աշխարհում, տեսնում ենք նաև Հայաստանի անունը, որն ամբողջ տարածաշրջանում միակն է»,-լրագրողների հետ հանդիպման ժամանակ հայտնեց Հասմիկ Մովսիսյանը։
Ardarutyun.com-ի հարցին՝ ինչպե՞ս են ընտրվել երաժիշտները կամ երաժշտական խմբերը, ովքեր մասնակցելու են փառատոնին, «Yerevan Music Week»-ի հիմնադիր տնօրենը պատասխանեց․
«Մենք հայտարարել էինք բաց կանչ, երաժիշտները դիմել էին։ Պահանջն էր՝ լինել կրեատիվ, հատկապես եվրոպական շուկայի համար ընկալելի և ընդունելի, որովհետև ցանկանում ենք, որ մեր եվրոպացի ունկնդիրը վայելի այն, ինչ տեսնում է այստեղ և հայտնաբերի մեկին, ով պատրաստ է դրսում հանդես գալ։ Եթե իրենց հայտնաբերեն՝ չպետք է սովորեցնեն, թե ինչպե՞ս գրեն խմբի անունը։ Պետք է պատրաստ լինի այդ մարդը մեկնել դուրս, ելույթ ունենալ, բավարար խոսի անգլերեն, կապեր ստեղծի, լիարժեք օգտագործի հնարավորությունները, որոնք իրեն տրված են։ Հայաստանում շատ խմբեր, երաժիշտներ կան, որոնք հայտնի են, ունեն միջազգային համբավ, սակայն պատրաստ չեն լուրջ միջազգային փառատոնների, որովհետև կամ ոչ բավարար արտիստիկ են կամ եվրոպական լսարանի «պրոդուկտ» չեն։ Դրա համար երաժիշտներին որ ընտրում ենք՝ պետք է համապատասխանեն միջազգային ստանդարտներին»։
«Obwald» փառատոնի գեղարվեստական ղեկավար Ռոման Բրիտշգին, ով եկել է Շվեյցարիայից, հայտնեց, որ առաջին անգամ է Հայաստանում՝ փնտրելու տաղանդավոր երաժիշտների, ճանաչելու հայկական մշակույթը։
«Ունեք հրաշալի երկիր, հանդիպել եմ հայ լավ երաժիշտների։ Մարդիկ բաց են՝ լսելու, սովորելու առումով»,-ասաց Ռոման Բրիտշգին։
Նշենք, որ մեկշաբաթյա հագեցած ծրագրի ընթացքում նախատեսվում են շուրջ 35 միջոցառումներ, որոնց մեծ մասը կանցկացվեն Հայաստանի պետական ֆիլհարմոնիայի հինգ համերգային սրահներում՝ «Առնո Բաբաջանյան» համերգասրահում։ Փառատոնի շրջանակներում կկայանան կենդանի համերգներ, պանելային քննարկումներ, վարպետության դասեր եւ սեմինարներ, հնարավորություն կստեղծվի մասնագիտական նոր ծանոթությունների եւ համագործակցությունների համար։ Համերգային ծրագրերից բացի, նախատեսվում են թեմատիկ քննարկումներ՝ նվիրված միջազգային փառատոնների դերին, համերգասրահներին եւ երաժշտական քաղաքների նշանակությանը, ինչպես նաեւ կանցկացվեն վարպետության դասեր՝ ներկայացնելու երաժիշտների համար գրագետ պորտֆոլիո ստեղծելու եւ երաժշտական մենեջեր
դառնալու գաղտնիքները։
«Yerevan Music Week»-ին կմասնակցեն արտիստներ ու բանախոսներ՝ Շվեյցարիայից, Գերմանիայից, Պորտուգալիայից, Թուրքիայից, Էստոնիայից, Ռուսաստանից, Մեծ Բրիտանիայից, Ֆրանսիայից, Ղազախստանից։
Այս տարի փառատոնն իրականացվում է Հայաստանի պետական ֆիլհարմոնիայի հետ
համատեղ, որը հանդիսանում է «Yerevan Music Week 2025»-ի պաշտոնական գործընկերը։ Yerevan Music Week-ն ընդգրկված է Եվրոպական փառատոնների ասոցիացիայի (EFA) փառատոնների ցանկում եւ նրանց կողմից ստացել է EFFE Label (Remarkable Arts Festival), որը եվրոպական տարածաշրջանի երաժշտական ասպարեզում շնորհվող որակի նշան է եւ տրվում է այն փառատոներին, որոնք խիստ արվեստամետ են, առանձնանում են տարբեր համայնքներին իրենց շուրջ համախմբելու կարողությամբ եւ բաց են միջազգային համագործակցության համար։ «Yerevan Music Week»-ի փակման համերգը նվիրված է Eurpean Folk Day-ին, եւ սեպտեմբերի 23-ին Լյուսի Խանյանի մասնակցությամբ կայանալիք համերգը ներառված է Եվրոպական ֆոլկ օրերի միջոցառումների շարքում։