Դաշտադեմ բնակավայրի գրադարանը անվանակոչվել է բանաստեղծ, արձակագիր, թարգմանիչ Վռամ Հովսեփյանի անունով։ Նա այս տարի կդառնար 100 տարեկան։

«Մատաղ սերունդը գրքի հետ այնքան էլ սեր չունի, բայց վստահ եմ՝ այս անվանակոչումից հետո կոնկրետ մեր բնակավայրի երեխաները կոգեշնչվեն Վռամ Հովսեփյանի ստեղծագործություններով ու ի դեմս նրա՝ մոտ կգտնվի գրականությանը»,-մեզ հետ զրույցում ասաց Դաշտադեմի վարչական շրջանի ղեկավար Արկադի Մարտիրոսյանը։

Դաշտադեմի գրդարանի գրադարանավարուհի Մարինե Կարապետյանը հույս հայտնեց, որ երեխաները սրանից հետո ավելի լավ կծանոթանան Վռամ Հովսեփյանի գործերին, քանի որ գրադարանը համալրվել է նրա գրքերով։

Նշենք, որ Վռամ Հովսեփյանը ծնվել է 1925 թվականի մայիսի 15-ին ՀՀ Ներքին Թալին (այժմ՝ Դաշտադեմ) գյուղում։ 1941-1945 թվականներին մասնակցել է Հայրենական մեծ պատերազմին և պարգևատրվել է շքանշաններով։ 1955 թվականին ավարտել է Երևանի պետական համալսարանի բանասիրական ֆակուլտետը։ 1955-1974 թվականներին Վռամ Հովսեփյանն աշխատել է «Հայգրքի» վարչությունում, Հայպետհրատում, «Մետաքսագործ» թերթի և «Պիոներ» ամսագրի խմբագրություններում, հանրապետական ժողովրդական ստեղծագործության տանը։ Վռամ Հովսեփյանը մահացել է երկարատև հիվանդությունից հետո 66 տարեկանում՝ 1991 թվականի նոյեմբերի 24-ին։

Վռամ Հովսեփյանի առաջին բանաստեղծությունը տպագրվել է 1950 թվականին «Գրական թերթում», առաջին գիրքը («Արագածի լանջից» խորագրով)՝ 1956 թվականին։ 1958 թվականից Վռամ Հովսեփյանն եղել է ԽՍՀՄ գրողների միության անդամ։ 19 գրքերի հեղինակ է։

Արևմտյան Հայաստանի ժամանակավոր կորստի ու բնօրրան հայրենիքին վերստին տիրանալու
կարոտաբաղձությունն իրենց արտահայտությունն են գտել Հովսեփյանի «Գուռգուռա» , «Ջոջանց տուն» պոեմներում, բանաստեղծությունների «Կանաչ մամուռ», «Տոհմածառ» և «Տեղատարափ», «Արևածագ» արձակ երկերի ժողովածուներում ամփոփված ոտանավորներում, նովելներում, պատմվածքներում, ինչպես նաև «Ճակատագիր» հուշագրության էջերում։