Մինչև այս պահը դե յուրե որոշված էր, որ համընդհանուր հայտարարագրման շրջանակներում սոցիալական կրեդիտներով քաղաքացիները կարող էին հետ ստանալ մանկապարտեզների, դպրոցների և բուհերի ուսման վարձերի պարագայում և առողջապահության ապահովագրության դեպքում. Այժմ այդ շրջանակն ընդլայնվում է: Այս մասին, այսօր՝ փետրվարի 13-ին, կառավարության նիստում հայտարարեց ՀՀ վարչապետ Նիկոլ Փաշինյանը
Նա պարզաբանեց, թե ինչ է սոցիալական կրեդիտների համակարգը. «Խոսքը այն մարդկանց մասին է, որոնք աշխատում են և նրանց աշխատավարձի համար հաշվեգրված է եկամտային հարկ և մարդիկ հայտարարագրվող ժամանակաշրջանում ծախսեր են արել այս ուղղություններով: Այդ դեպքում մարդիկ հայտարարագիրը ներկայացնելուց հետո, սոցիալական այդ ուղղությամբ արած ծախսերից մինչև 100,000 դրամ կարող են ետ ստանալ: Այսինքն իմաստը հետևյալն է,մարդը աշխատել է, եկամտային հարկ է վճարել, բայց նաև զուգահեռ ծախս է արել կառավարության սահմանած ուղղություններով, հիմա կառավարությունը տեսնում է, որ հայտարարագրում մարդը այդ ծախսը արել է, ասում է, որ մինչև 100,000 դրամ մենք վերադարձնում ենք»: Փաշինյանը նկատեց, որ սա վերաբերում է նաեւ այն անձանց, որը տուն է վարձով տվել եւ դրանից եկամտային հարկ է վճարել:
ՀՀ վարչապետը թվարկեց, թե որ ծախսերի դեպքում է քաղաքացին հետ ստանում գումարները. «Ուսման վարձ, քոլեջում ուսման վարձ, վճարովի դպրոցում ուսման վարձ, մանկապարտեզի վճար, առողջապահության ապահովագրություն: Հիմա այս նոր որոշմամբ արդեն նաեւ երաժշտական դպրոցի, արվեստի դպրոցի, գեղարվեստի դպրոցի, պարարվեստի դպրոցի, արտադպրոցական կազմակերպությունների ամենատարբեր կրթական ծրագրերի ծախսերը: Ասենք գնացել են լեզվի, սպորտի, ինժեներական խմբակ, IT խմբակ և այլն: ԿԳՄՍՆ-ի կողմից երաշխավորված այլ արտադպրոցական ծրագրերի և ոչ ֆորմալ կրթական ծրագրերի մասով կատարված ուսման վճարները: Այս բոլոր ուղղություններով մարդիկ կարող են իրենց վճարած գումարները համընդհանուր հայտարարագրման արդյունքում ետ ստանալ։
Մանրամասները` տեսանյութում