Popular Mechanics-ը գրում է, որ հաճախակի են հաղորդումները Կոնգո գետի անտառներում հանդիպած մոկելե-մբեմբե անունով արարածի մասին։ Կոնգոյի հովտում ապրող ժողովուրդների լեգենդների համաձայն՝ մոկելե-մբեմբեն ունի հսկայական չափեր, երկար վիզ և փոքր գլուխ։ Նախկինում որոշ գիտնականներ հավանական էին համարում մոկելե-մբեմբեի գոյությունը, քանի որ ըստ նրանց՝ Կոնգոյի անանցանելի անտառներում և ճահիճներում հնարավոր էր, որ կենդանի դինոզավր մնար։ Սակայն կենդանու որոնումները որևէ արդյունք չեն տվել։

Չնայած վերջին տարիներին մոկելե-մբեմբեի դիտարկումներն ավելի հաճախ են գրանցվում, մասնագետները դեռևս կասկածում են նրա գոյության փաստը։ Նրանց կարծիքով՝ արարածի մասին հաղորդումների աճը կարող է կապված լինել ջունգլիների հատման հետ, ինչի արդյունքում այնտեղ բնակվող կենդանիները ստիպված են տեղափոխվել այլ վայրեր։ Մարդիկ, ովքեր նախկինում երբեք չեն տեսել այդ կենդանիներին, սխալմամբ համարում են դրանք առասպելական հրեշներ,-գրում է National Geographic-ը։ Ավելի վաղ՝ Ալյասկայի ափերի մոտ օվկիանոսի հատակին, գիտնականները հայտնաբերել էին տարօրինակ «ոսկե գունդ»։ Յակուտիայում էլ անտառում հայտնաբերել են խորհրդավոր նյութ, որն իբր դուրս էր եկել հողից։