Գիտական «Live Science» ամսագրի հոդվածում նշվում է, որ գիտնականները նոր հետազոտություն են անցկացրել, որի արդյունքում պարզվել է, որ Երկիր ընկած երկու երկնաքարերը կարող էին Մերկուրի մոլորակից լինել։ Մինչդեռ, Երկիր հասնող տիեզերական մարմինների մեծ մասը գալիս է Մարսի և Յուպիտերի միջև գտնվող ատերոիդների գոտուց կամ Լուսնից։
«Քանի որ Մերկուրին գտնվում է Արեգակի մոտ, այնտեղից նմուշներ հավաքելու ցանկացած տիեզերական առաքելություն բարդ և թանկ կլինի։ Այսպիսով, բնական ճանապարհով Երկիր հասած մոլորակի բեկորը կարող է լինել դրա մակերևույթն ուղղակիորեն ուսումնասիրելու միակ գործնական միջոցը, ինչը նման հայտնագործությունը դարձնում է անգնահատելի գիտական տեսանկյունից», – նշվում է հոդվածում։
Հոդվածում ընդգծում են, որ NASA-ի դիտարկումների շնորհիվ կարելի է եզրակացություններ անել Մերկուրիի կեղևի բաղադրության մասին։ Մոլորակի վրա առկա են նատրիումով հարուստ պլագիոկլազ (ալբիտ), երկաթի ցածր պարունակությամբ պիրոքսեն (ենստատիտ), երկաթի ցածր պարունակությամբ օլիվին (ֆորստերիտ) և սուլֆիդային հանքանյութեր, ինչպիսին օլդհամիտն է։
««Ksar Ghilane 022» և «Northwest Africa 15915» երկնաքարերը՝ այս երկու նմուշները, ըստ երևույթին, կապված են միմյանց հետ և հավանաբար ծագում են նույն մարմնից։ Նրանց միներալոգիան և մակերեսային բաղադրությունը նաև ցույց են տալիս հետաքրքիր նմանություններ Մերկուրիի կեղևի հետ»,-նշվում է հրապարակման մեջ։
Երկու երկնաքարերն էլ պարունակում են օլիվին և պիրոքսեն, ալբիտ պլագիոկլազի փոքր քանակություն և օլդհամիտ։ Բացի այդ, նրանց թթվածնային բաղադրությունը համընկնում է աուբրիտների բաղադրությանը։ Սակայն նմուշների տարիքը կազմում է 4528 միլիոն տարի, մինչդեռ Մերկուրիի մոտավոր տարիքը 4000 միլիոն տարի է։
Եթե այս երկնաքարերն իսկապես Մերկուրիից են, ապա դրանք ներկայացնում են վաղնջական նյութ, որը մասնակցել է մոլորակի ձևավորմանը, ենթադրում են հետազոտողները։
Ավելի վաղ գիտնականները սկսել էին ուսումնասիրել ԱՄՆ-ում տնակին հարվածած երկնաքարը։