Այս տարվա սեպտեմբերի մի քանի օրվա երթևեկության խցանումների թիվը մոտ 18%-ով ավելի պակաս է նախորդ տարվա սեպտեմբերի թվի հետ համեմատած։ Այս մասին սեպտեմբերի 15-ին մամուլի ասուլիսի ժամանակ հայտնել է Երևանի քաղաքապետ Տիգրան Ավինյանը։
«Սա կարևոր արձանագրում է՝ ավտոբուսի գծերն ավելացել են, ավտոբուսներն ավելացել են, երթևեկության փոփոխություններ ենք իրականացրել, դպրոցների ժամն ենք 15 րոպե առաջ բերել։ Սա բերել է նրան, որ Երևանում սեպտեմբերի սկզբին կարողացել ենք ավելի նվազ խցանումներ ունենալ»,-նշել է քաղաքապետը։
Քաղաքաշինության դոկտոր Մարիամ Խաչատրյանը դրական է գնահատում հանրակրթական դպրոցներում դասերը ժամը 08։15-ին սկսելը՝ խցանումների մակարդակը նվազեցնելու առումով, սակայն չի կարծում, որ ավտբուսի մի քանի առանձնացված գծերը հարց են լուծելու։
«Ավտոբուսն առանձնացված գծով գնում, հետո հայտնվում է խցանման մեջ։ Քանի դեռ ամբողջական առանձնացված չեն ավտոբուսի գծերը՝ դժվար է ասել՝ օգնե՞լ է, թե՞ ոչ։ Պետք է այդ հատվածներից հանեն նաև կարմիր գծերը, որովհետև դրա պատճառով ավտոբուսն արդեն երկրորդ գծով է գնում»,-մեզ հետ զրույցում նշեց Մարիամ Խաչատրյանը։
Նրա փոխանցմամբ՝ օրինակ Ֆրանսիայում թույլ են տալիս, որպեսզի տաքսիները ևս երթևեկեն ավտոբուսների համար առանձնացված գծերով։
Քաղաքաշինության դոկտորը կարևորեց նաև Կենտրոնում արգելապատնեշները վերացնելը։
«Երևանի ճանապարհները փակուղային են։ Գնում ու շենքի ես հանդիպում։ Արգելապատնեշները հատկապես Կենտրոնից պետք է հանվեն, որովհետև խցանումների ժամանակ վարորդները բակերով էին գնում, իսկ հիմա հնարավոր չէ»,-ընդգծեց մեր զրուցակիցը։
Մանրամասները՝ տեսանյութում