Մայրաքաղաքի բնակիչներն աղբահանության համար արդեն կարող են վճարել հաշվառման նոր համակարգով, որին միացել են մի շարք հարթակներ և վճարահաշվարկային կազմակերպություններ։ Երևանի ավագանու հերթական նիստի ժամանակ այս մասին ասել է քաղաքապետարանի աշխատակազմի եկամուտների հաշվառման և գանձման վարչության պետի ժամանակավոր պաշտոնակատար Դավիթ Հակոբյանը։

Աղբահանության վճարի արդեն իսկ հաշվարկված պարտքն առցանց հարթակում դիտել և վճարում կատարել հնարավոր է yerevan.am, pay.e–community.am, «Հայփոստ», Еasy pay համակարգերով և «Հայէկոնոմբանկ»-ի մասնաճյուղերում։

Երևանի ավագանու որոշմամբ՝ մայրաքաղաքի բնակիչներն ազատվեցին 2025 թվականի հունվարից մայիս ամիսների համար մինչև հուլիսի 31–ը հաշվարկված տույժերից։

Մինչև հուլիսի 31-ը կուտակված ոչ մի տույժ-տուգանք չի գործելու, ամբողջը հաշվանցվելու է քաղաքացիների փաստացի աղբահանության վճարին՝ ասաց Երևանի քաղաքապետ Տիգրան Ավինյանը։ Իսկ փոխքաղաքապետ Լևոն Հովհաննիսյանը տեղեկացրեց, որ աղբահանության համար վճարումներն արդեն հասանելի են առցանց տարբերակով։ Դրանք կարելի է կատարել Երևանի քաղաքապետարանի կայքի համապատասխան բաժնում, pay.e-community.am կայքում, «Հայփոստ»-ի բոլոր մասնաճյուղերում, EasyPay վճարային համակարգով և «Հայէկոնոմբանկ»-ի բջջային հավելվածով։