Եվրոպական Միության LIVEMX ծրագրի դրամաշնորհի միջոցով Հայաստանի պետական ֆիլհարմոնիան կիրականացնի «ՌԵԶՈՆԱՆՍ․ վերափոխելով Հայաստանում կենդանի երաժշտության համերգների և համերգասրահների սպասարկման մասին պատկերացումները» նախագիծը։ Հիմքում Հայաստանում կենդանի երաժշտության ոլորտում նոր մասնագետների ներգրավումը, ժամանակակից ստանդարտների ներդրումը և տեխնիկական անձնակազմերի վերապատրաստումն է, փորձի փոխանակումը՝ եվրոպացի փորձագետների և ոլորտի հայ
մասնագետների հետ։
Հայաստանի պետական ֆիլհարմոնիայի տնօրեն Արտյոմ Նաղդյանի խոսքով՝ սա ֆիլհարմոնիայի թիմի կողմից դրամաշնորհային առաջին ծրագրի կազմակերպումն է և կարևոր է դահլիճներում աշխատող տեխնիկական անձնակազմի վերապատրաստման համար։
Նրա փոխանցմամբ՝ հաճախ տեխնիկական գույք ձեռք բերելուց հետո սպասարկումը լուրջ հարց է հանդիսանում։
Հարցին՝ ի՞նչ խնդիրների էին բախվում նախքան ծրագրին դիմելը, Արտյոմ Նաղդյանը պատասխանեց․ «Այսօր ՀՀ-ում եթե կա ցանկություն՝ սովորել լուսային կամ ձայնային ռեժիսորի մասնագիտությամբ, չգիտեմ, թե որտեղ են դասավանդում։ Սրանից հետո գալիս են մյուս խնդիրները․ եթե խոսքը դասական երաժշտության կամ ակադեմիական արվեստի մասին է, ապա այն չի դասավանդվում։ Դասավանդվում են գիտելիքները, որոնցով կարելի է կառավարել այս կամ այն վահանակը, բայց ոլորտում լիարժեք լինելու և սպասարկելու համար զրոյից մեծ աշխատանք պետք է կատարել, որովհետև բեմի պատասխանատուն պետք է իմանա՝ մեկ, թե եռամաս ստեղծագործություն է կատարվում, ի՞նչ է անհրաժեշտ բեմում։ Նույնը վերաբերում է հնչյունային ռեժիսորին։ Եթե երկար տարիներ չլսի դասական երաժշտություն՝ հետո չի կարողանա ձայնը ստանալ»,-նշեց Արտյոմ Նաղդյանը։
Շարունակելով գործընկերոջ խոսքը՝ «Ռեզոնանս» նախագծի ղեկավար Վարդգես Սայադյանը հայտնեց, որ ծրագիրը տևելու է մեկ տարի և այդ ընթացքում նախատեսվում են ոլորտի ներկայացուցիչներին համատեղելը, առկա մարտահրավերները վեր հանելը և լուծումներ գտնելը։
Նախագծի շրջանակում նախատեսվում են հետևյալ հիմնական վերապատրաստումները․ հմտությունների զարգացում ձայնային տեխնոլոգիայում, լուսային լուծումների նախագծում, լսարանի ներգրավման և համերգասրահների կառավարման ոլորտներում, երաժշտական ռեզիդենտություններ և շոու-ծրագրեր, որոնք համատեղ ստեղծագործելու հարթակ կձևավորեն ու կնպաստեն միջազգային ճանաչելիությանը, կայուն մեթոդների ներդրում՝ ներառյալ էկոլոգիապես մաքուր միջոցառումների անցկացում և «կանաչ տեխնոլոգիաներ»-ի օգտագործումը, թվայնացում և բաց հասանելիությամբ թվային կրթական հարթակի ստեղծում։
Դասընթացից հետո շրջանավարտները կներկայացնեն իրենց կազմակերպած համերգների շարքը՝ նոր տեխնոլոգիական լուծումներով։ Ծրագրին կարող են մասնակցել 18 տարեկանը լրացած անձինք։
Նախագիծը կիրականացվի 6 ամիսների ընթացքում՝ 2025-ի հուլիսից 2026-ի
հունվար: