Թաիլանդի հյուսիսում, անտառում, հայտնաբերվել է ութամյա տղա, ում, ըստ ամենայնի, մեծացրել են շները։
Կենդանիները տարիներ շարունակ օգնել են երեխային գոյատևել։ Այդ ամբողջ ընթացքում նա ապրել է փլված հյուղակում իր մոր հետ, ով՝ ծանր թմրամոլ լինելով, մշտապես տղային մենակ է թողել։
Տեղացիների ահազանգերից հետո դեպքով սկսել է զբաղվել երեխաների և պատանիների պաշտպանության ոլորտում գործող բարեգործական կազմակերպությունը։ Կատարվել է խուզարկություն և տղային հայտնաբերել են վեց շների շրջապատում։
Տեղաբնակների խոսքով՝ ոչ ոք չէր ուզում, որ իրենց երեխաները մոտենան այդ տղային։ Արդյունքում նա ավելի ու ավելի շատ է կապվել շների հետ և սկսել նրանց վարքագծով ապրել։ Փրկության պահին, ականատեսների վկայությամբ, տղան սողացել է չորքոտանի նման ու հաչել։
«Նա չէր խոսում՝ միայն հաչում էր։ Դա սարսափելի տեսարան էր»,-հաստատել է Պավինա Խոնգսակուլը։
Ներկայումս տղան տեղափոխվել է տեղի մանկական խնամքի կենտրոն։ Թաիլանդի իշխանությունները նրան պաշտոնապես կոչում են միայն “Ա” տառով։
«Մենք շարունակելու ենք հետևել նրա վիճակին և կանենք հնարավոր ամեն բան, որպեսզի նա ստանա այն ամենը, ինչ անհրաժեշտ է։ Նա ունի լավ կյանքի հնարավորություն», – ասել է բարեգործական կազմակերպության ղեկավարը։