«Քաղաքացիական պայմանագիր» խմբակցության պատգամավոր Հրաչյա Հակոբյանը Ազգային ժողովում լրագրողների հետ զրույցում հայտնեց, որ դեկտեմբերին կողոպտել են իր բնակարանը։

«Տարել են գումար, մի քանի ոսկյա շղթա, մեկ ժամացույց։ Ընդհանուր վնասի չափը կազմում է մոտ 7,5 մլն դրամ»,- ասաց նա։

Վերջինիս խոսքով՝ չնայած որ դեպքը տեղի է ունեցել դեկտեմբերին, ինքը ոստիկանություն դիմել է հունվարի 14-ին:

«Որովհետև այդ օրն եմ վերադարձել, Նահանգներում էի։ Իմ երեխաները բնակվում են Նահանգներում։ Ես ամուսնալուծված եմ նախկին կնոջս հետ, նախկին կինս ամուսնացել է Ամերիկայում բնակվող քաղաքացու հետ, ես նախընտրել եմ, որ երեխաներս մեծանան իրենց մոր հետ»,- ասաց նա:

Ըստ Հակոբյանի՝ գողություն կատարծ անձը տեղյակ է եղել, որ ինքը Հայաստանում չէ, քանի որ ամեն տարի տոն օրերին մեկնում է Նահանգներ։