Թեհրանում ջրի դեֆիցիտը հասել է աղետալի չափերի, այնքան լուրջ, որ Իրանի նախագահ Մասուդ Փեզեշքիանը նախազգուշացրել է մայրաքաղաքի բնակիչների հնարավոր էվակուացիայի մասին։ «Եթե մինչև նոյեմբերի վերջ Թեհրանում անձրևներ չգան ստիպված կլինենք սահմանափակել ջրի օգտագործումը: Իսկ, եթե անձրևներ չլինեն ստիպված կլինենք էվակուացնել»,-ասել է Փեզեշքիանը։ Մայրաքաղաքի հիմնական խմելու ջրի աղբյուրը՝ Ամիր-Կաբիր ջրամբարը, «պարունակում է միայն 14 միլիոն խորանարդ մետր ջուր, ինչը կազմում է նրա ծավալի 8 տոկոսը»,-հայտնել է Թեհրանի ջրամատակարարման պատասխանատու Բեհզադ Պարսան` նախազգուշացնելով, որ այդ մակարդակով քաղաքը կարող է ինքն իրեն ապահովել ջրով միայն «երկու շաբաթով»։ Թեհրանում բնակվում է ավելի քան 10 միլիոն մարդ, և նրանք օրական մոտ 3 միլիոն խորանարդ մետր ջուր են օգտագործում: Ջրի տնտեսման միջոցառումների շրջանակում, ըստ հաղորդագրությունների, վերջին օրերին Թեհրանի մի քանի շրջաններում ժամանակավորապես դադարեցվում է ջրամատակարարումը, ընդհատումներ էին լինում նաև ամռանը։ Արևելքի և գլոբալ կարգավորման ուսումնասիրության կենտրոնը (CMEG) իր վերջին վերլուծական զեկույցում Iran and Regional (In-)Stability & Security Briefing (IRIS) եզրակացնում է, որ Իրանում ջրային ռեսուրսների ճգնաժամը ընդգրկում է ոչ միայն ջրամբարները, այլեւ «թալանված ջրաբույսերի տարածքները եւ երկրի սպառված ստորգետնյա ջրային շերտերը»։ Բացի այդ, նկատելի չեն այն նշանները, որ «իրանական իշխանությունները պատրաստ են փոխել իրենց ուղղությունը» եւ ներդրումներ կատարել ենթակառուցվածքներում, ուստի իրավիճակը, փորձագետների գնահատմամբ, շարունակելու է վատթարանալ: