ԱՄՆ նախագահ Դոնալդ Թրամփը հայտարարել է, որ Ուկրաինային կհասցնի «Պատրիոտ» զենիթահրթիռային համակարգեր։ «Մենք նրանց կհասցնենք «Պատրիոտները», քանի որ Պուտինը իսկապես շատերին զարմացրեց։ Նա գեղեցիկ է խոսում, իսկ երեկոյան ռմբակոծում է բոլորին անխտիր»,_ լրագրողներին ասել է Թրամփը։ Ընդամենը երկու շաբաթ առաջ Թրամփը դադարեցրել էր Ուկրաինա կարևոր սպառազինության մատակարարումները։ Սակայն, ըստ նրա, համակարգերը Ուկրաինա կհասցվեն ՆԱՏՕ-ի միջոցով և կֆինանսավորվեն ՆԱՏՕ-ի կողմից․«ԵՄ-ն դրա համար կվճարի։ Մենք ոչինչ չենք վճարում, բայց մենք կհասցնենք։ Մենք փաստացիորեն նրանց կուղարկենք բարձր տեխնոլոգիական ռազմական սարքավորումների տարբեր բաղադրիչներ, և նրանք ամբողջությամբ կվճարեն դրա համար»,_ նշել է Թրամփը։ Սակայն, կոնկրետ ո՞ր երկրները կվճարեն՝ դեռ պարզ չէ։ Նա նաև տեղեկացրել է, որ այսօր «կարևոր հայտարարություն» կանի Ռուսաստանի վերաբերյալ․ ակնկալվում է, որ ԱՄՆ Կոնգրեսում նախատեսվում է խստացնել Մոսկվայի նկատմամբ պատժամիջոցները։