ԱՄՆ նախագահ Դոնալդ Թրամփը Սպիտակ տանը կայացած մամուլի ասուլիսի մեկնարկին անակնկալ կերպով ուշադրությունը կենտրոնացրել է ոչ թե Ուկրաինայում ընթացող պատերազմի վրա, այլ՝ ֆուտբոլի։ ՖԻՖԱ-ի նախագահ Ջանի Ինֆանտինոյի հետ միասին նա հայտարարել է, որ 2026 թվականի ֆուտբոլի աշխարհի առաջնության վիճակահանությունը կանցկացվի դեկտեմբերի 5-ին Վաշինգտոնում։
Ինֆանտինոն Օվալաձև գրասենյակ է տարել Աշխարհի գավաթը և Թրամփին է հանձնել մրցաշարի եզրափակչի խորհրդանշական տոմս։
Այնուամենայնիվ, Թրամփը կարճ անդրադարձել է Ուկրաինայի պատերազմին։ Նա Ռուսաստանին սպառնացել է «կոշտ պատժամիջոցներով», եթե ռազմական գործողությունները չդադարեցվեն։
«Ես բացարձակապես ուրախ չեմ այս հակամարտությամբ․ ոչնչով, նույնիսկ՝ ամենափոքր չափով։ Կարծում եմ, առաջիկա երկու շաբաթվա ընթացքում պարզ կլինի, թե իրավիճակն ինչպիսին է լինելու»,-ասել է նա։
ԱՄՆ նախագահը նաև խոսել է Վլադիմիր Պուտինի և Վլադիմիր Զելենսկու հնարավոր հանդիպման մասին։ Նրա խոսքով՝ նրանց միջև հնարավոր է ուղիղ երկխոսություն։
«Գիտե՞ք, դա մի քիչ նման է յուղի և քացախի։ Նրանք այնքան էլ լավ չեն հարաբերվում միմյանց հետ՝ հասկանալի պատճառներով։ Կտեսնենք՝ հարկ կլինի՞, որ ես այնտեղ ներկա լինեմ։ Ես կուզենայի չլինել»,- հավելել է Թրամփը։
Մինչդեռ Ռուսաստանի արտգործնախարար Սերգեյ Լավրովը NBC հեռուստաալիքին հայտարարել է, որ «ոչ մի հանդիպում չի նախատեսվում»։