ԱՄՆ նախագահ Դոնալդ Թրամփը, որն ավելի վաղ ՌԴ նախագահ Վլադիմիր Պուտինին 50 օր էր տվել Ուկրաինայի հետ խաղաղության համաձայնագրի հասնելու համար, նոր հայտարարություն է արել։ Նա ասել է, որ արդեն հիասթափված է Կրեմլի առաջնորդի գործողություններից և մտադիր է կրճատել տրված ժամկետը։ Այժմ, ըստ Թրամփի, նա պատրաստ է Պուտինին տալ ընդամենը «10-12 օր»:

«Ես հիասթափված եմ նախագահ Պուտինից, շատ հիասթափված եմ: Կտեսնենք, ես պատրաստվում եմ կրճատել նրան տված 50 օրը, քանի որ կարծում եմ, որ արդեն գիտեմ պատասխանը, թե ինչ է լինելու հաջորդը», - ասել է Թրամփը Մեծ Բրիտանիայի վարչապետի հետ հանդիպման ժամանակ:

ԱՄՆ նախագահը հավելել է, որ արդեն «չորս կամ հինգ անգամ» խոսել է Պուտինի հետ, բայց բանակցություններով չեն կարողացել հասնել հրադադարի:

Սկզբում Թրամփը պահանջել է, որ Պուտինը դադարեցնի պատերազմը մինչև սեպտեմբերի 2-ը: Հակառակ դեպքում, նրա խոսքով, կհետևեն նոր տնտեսական պատժամիջոցներ, այդ թվում՝ այն երկրների դեմ, որոնք շարունակում են առևտուր անել Ռուսաստանի հետ: Միևնույն ժամանակ, ամերիկացի առաջնորդը նշել է, որ «սիրում է Ռուսաստանը» և չէր ցանկանա սահմանափակումներ մտցնել Ուկրաինայի պատճառով։