ԱՄՆ նախագահ Դոնալդ Թրամփը մտադիր է արմատապես փոխել Կոկա-Կոլայի բաղադրությունը․ այն պետք է քաղցրացվի ոչ թե եգիպտացորենի օշարակով, ինչպես ընդունված է եղել տասնամյակներ շարունակ, այլ եղեգի շաքարով։ Այս մասին Թրամփը հայտարարել է Truth Social հարթակում։
Նրա խոսքով՝ ինքն անձամբ է բանակցել Կոկա-Կոլա ընկերության ղեկավարության հետ, և, ըստ Թրամփի, ընկերության բարձրագույն ղեկավարները համաձայնություն են տվել։ Թեև ընկերությունը պաշտոնապես դեռ չի հաստատել բաղադրատոմսի փոփոխությունը, բայց խոստացել է «մոտ ապագայում ավելի շատ մանրամասներ հայտնել Coca-Cola ապրանքատեսականիում նորարարությունների մասին»։
Եվրոպայում և Մեքսիկայում Կոկա-Կոլան վաղուց է քաղցրացվում եղեգի շաքարով։ Իսկ ԱՄՆ-ում դեռևս 1980-ականներից սկսած հիմնականում օգտագործվում է բարձր ֆրուկտոզայով եգիպտացորենի օշարակ, որն ավելի քաղցր է, ավելի էժան և ավելի երկարաժամկետ պահպանման հատկություններ ունի։ Սակայն բազմաթիվ մասնագետներ այն համարում են առողջության համար վնասակար և հանդես են գալիս դրա օգտագործումը արգելելու օգտին։