Ինչպես հաղորդում է Reuters գործակալությունը, Հնդկաստանի մի քանի պետական նավթային ընկերություններ անցյալ շաբաթվանից դադարեցրել են ռուսական նավթի գնումները։ Պատճառները կապված են հուլիսին ռուսական նավթի զեղչերի կրճատման և ԱՄՆ նախագահ Դոնալդ Թրամփի կողմից գործադրվող ճնշման հետ։
Հնդկաստանը նավթի խոշորագույն ներմուծողներից է աշխարհում և մինչ այժմ եղել է ռուսական նավթի կարևորագույն գնորդներից, որն հիմնականում ներկրվում է ծովային ճանապարհով։
Վերջին շաբաթներին Թրամփը զգալիորեն ուժեղացրել է ճնշումը Հնդկաստանի վրա։ Նա սպառնացել է օգոստոսից սկսած հնդկական ապրանքների նկատմամբ սահմանել 25% մաքսատուրքեր, ինչպես նաև հավելյալ պատժամիջոցներ, եթե երկիրը շարունակի գնել էժան ռուսական նավթ, գազ և զենք։ Թրամփն անգամ խոսել է 100%-անոց մաքսատուրքերի մասին։
Այս պահին նավթ գնել դադարեցրած ընկերություններից ոչ մեկը չի մեկնաբանել այս փոփոխությունը։ Հնդկաստանի նավթի նախարարությունը նույնպես լռում է։
Reuters-ի տվյալներով՝ Ռուսաստանի փոխարեն հնդկական պետական ընկերություններն այժմ նախընտրում են կարճաժամկետ գործարքներ Մերձավոր Արևելքի և Արևմտյան Աֆրիկայի մատակարարների հետ։ Հատկապես մեծ պահանջարկ ունի Աբու Դաբիի նավթը։
Անհայտ է՝ արդյոք հնդկական պետական ընկերությունները մտադիր են երկարաժամկետ կերպով հրաժարվել ռուսական հումքից, թե՞ պարզապես փորձում են ստիպել Կրեմլին՝ Ուկրաինայի հետ բանակցություններում առաջարկել ավելի շահավետ պայմաններ։