Ամերիկայի Միացյալ Նահանգները երրորդ անգամ հայտարարում է դուրս գալու մասին ՅՈՒՆԵՍԿՕ-ից՝ ՄԱԿ-ի կազմում գործող կազմակերպությունից, որը զբաղվում է կրթության, գիտության և մշակույթի հարցերով։ Այս որոշման նախաձեռնողը դարձել է ԱՄՆ նախկին նախագահ Դոնալդ Թրամփը։ ԱՄՆ Պետդեպարտամենտը հայտարարել է, որ «ՅՈՒՆԵՍԿՕ-ին մասնակցությունը չի համապատասխանում ԱՄՆ-ի ազգային շահերին»։
Վարչակազմի ներկայացուցիչ Թեմի Բրուսի խոսքով, կազմակերպությունը «խթանում է մշակութային և սոցիալական առումով հասարակությունը պառակտող օրակարգ»։ Վաշինգտոնը հատկապես դժգոհ է, որ ՅՈՒՆԵՍԿՕ-ին անդամակցել է Պաղեստինը, ինչը, ըստ ամերիկյան կողմի, «խթանում է հակաիսրայելյան տրամադրությունները» և «հակասում է ԱՄՆ քաղաքականությանը»։
Սպիտակ տան մամուլի քարտուղարի տեղակալ Աննա Քելլին New York Post-ին հայտարարել է, որ ՅՈՒՆԵՍԿՕ-ն աջակցում է «բաժանարար գաղափարներին», ինչը, ըստ նրա, «հակասում է այն ընտրությանը, որը կատարել են ամերիկացիները վերջին ընտրությունների ժամանակ»։
ԱՄՆ-ի վերջնական դուրս գալը ՅՈՒՆԵՍԿՕ-ից նախատեսված է 2026 թվականի դեկտեմբերին։ 2023 թվականին Միացյալ Նահանգները վերադարձել էր կազմակերպություն՝ նախագահ Ջո Բայդենի նախաձեռնությամբ։ Սակայն, կարծես, պատմությունը կրկնվում է․ առաջին անգամ ԱՄՆ-ն դուրս է եկել ՅՈՒՆԵՍԿՕ-ից Ռոնալդ Ռեյգանի օրոք՝ 1984 թվականին, այնուհետև՝ 2017-ին, արդեն Դոնալդ Թրամփի նախագահության ժամանակ։