ՀՀ ԱԳ նախարար Արարատ Միրզոյանը և ՌԴ ԱԳ նախարար Սերգեյ Լավրովը ստորագրել են Հայաստանի Հանրապետության արտաքին գործերի նախարարության և Ռուսաստանի Դաշնության արտաքին գործերի նախարարության միջև 2025-2026 թթ. համար խորհրդակցությունների ծրագիրը։
Մենք այսօր էլ կարևորում ենք դաշնակցային հարաբերությունները Հայաստանի հետ, երկու ժողովուրդների միջև խորը կապերը։ Մեզ մոտ ստեղծված են բազմաթիվ նախադրյալներ պետությունների միջև փոխհարաբերությունների բոլոր ոլորտներում, որոնք պետք է առավելագույնս և խելամտորեն օգտագործել։ Այս մասին Երևանում հայտարարել է Ռուսաստանի ԱԳ նախարար Սերգեյ Լավրովը։
«Մենք, ինչպես և նախկինում, մեր դաշնակցության կարևորագույն ուղղություններից մեկն ենք համարում անվտանգության ոլորտը։ Մենք պատրաստ ենք ամեն կերպ աջակցել Հայաստանի պաշտպանության, ինքնիշխանության և տարածքային ամբողջականության ապահովմանը։
Այս տարի մենք նշում ենք Հանրապետության տարածքում ռուսաստանյան ռազմաբազայի մասին պայմանագրի ստորագրման 30-ամյակը և Ռուս-հայկական մարդասիրական արձագանքման կենտրոնի բացման 10-ամյակը։
Ռուսաստանցի սահմանապահները շարունակում են ծառայություն իրականացնել հայ գործընկերների հետ հայ-թուրքական և հայ-իրանական սահմանին», - նշել է նա։
Նշենք, որ այսօր՝ մայիսի 21-ին, Երևանում՝ Հայաստանի Արտաքին գործերի նախարարության շենքի դիմաց, տեղի է ունեցել Հայաստանի եվրոպական կուսակցության նախաձեռնած բողոքի ակցիան։
Ակցիայի մասնակիցները դեմ են Ռուսաստանի ԱԳ նախարար Սերգեյ Լավրովի այցին և ընդունելությանը։ Ցուցարարները ձեռքներին պահել են Հայաստանի և Եվրամիության դրոշները, ինչպես նաև Ռուսաստանի նախագահ Վլադիմիր Պուտինի և ԱԳ նախարար Սերգեյ Լավրովի պատկերներով պաստառներ, որոնց վրա գրված է «Մարդասպաններ»։
