Քաղցրի նկատմամբ ուժեղ ցանկությունը կարող է վկայել օրգանիզմում որոշ տարրերի՝ օրինակ, քրոմի, ֆոսֆորի, ծծումբի և տրիպտոֆանի պակասի մասին։ Ամեն տարի շաքարով հարուստ ըմպելիքների չափից շատ օգտագործումը աշխարհում դառնում է ավելի քան 1,1 միլիոն սրտանոթային հիվանդության դեպքի պատճառ։ Այս մասին «Газета.Ru»-ի հետ զրույցում հայտնել է Եվրոպական բժշկական կենտրոնի (ЕМС) սրտաբան և ֆունկցիոնալ ախտորոշման բժիշկ Ռաշիդ Սոնգուրովը։
Նա նշել է, որ մեկ բաժակ խաղողի կամ խնձորի հյութը կարող է պարունակել օրական շաքարի ընդունելի չափաբաժնի մինչև 50%-ը։ ԱՀԿ-ն (Առողջապահության համաշխարհային կազմակերպություն) խորհուրդ է տալիս, որ շաքարի բաժինը սննդակարգում չգերազանցի օրական ընդհանուր կալորիաների 10%-ը, իսկ նախընտրելի է՝ ոչ ավելի քան 5%-ը (մոտ 25 գ կամ վեց թեյի գդալ)։ Սակայն նույնիսկ մեկ քաղցր ըմպելիքն արագորեն կարող է գերազանցել այդ սահմանաչափը, հատկապես, եթե մարդն օգտագործում է մրգեր, քաղցրավենիք և շաքարով հարուստ այլ մթերքներ։ Բժիշկը ուշադրություն է հրավիրում այն փաստի վրա, որ նման ըմպելիքները նպաստում են քաշի ավելացմանը, ինսուլինակայունության և նյութափոխանակության խանգարումների զարգացմանը, որոնք իրենց հերթին կարող են հանգեցնել շաքարային դիաբետի և սրտանոթային հիվանդությունների։
«Շաքարի ավելցուկը նպաստում է տրիգլիցերիդների մակարդակի բարձրացմանն ու «լավ» խոլեստերինի (HDL) նվազմանը։ Սա մեծացնում է աթերոսկլերոզի զարգացման վտանգը՝ հիվանդություն, որի դեպքում զարկերակների պատերը հաստանում են և կորցնում առաձգականությունը»,- նշել է բժիշկը։ Արդյունքում, դա կարող է հանգեցնել սրտի կաթվածի կամ ինսուլտի։ Բացի այդ, շաքարով հարուստ ըմպելիքների կանոնավոր օգտագործումը նպաստում է ներքին օրգանների շուրջ ճարպի կուտակմանը, ինչը հանդիսանում է իշեմիկ հիվանդության հիմնական պատճառներից մեկը։
Բժիշկը խորհուրդ է տալիս մանրամասն ուսումնասիրել ըմպելիքների բաղադրությունը փաթեթավորման վրա, խուսափել էներգետիկ ըմպելիքներից, փաթեթավորված հյութերից և գազավորված ըմպելիքներից։ Դրանց փոխարեն նախընտրելի է օգտագործել ջուր` բնական հավելումներով, ինչպիսիք են կիտրոնը, անանուխը կամ վարունգը, ինչպես նաև առանց շաքարի բուսական կամ կանաչ թեյ։