Իլոն Մասկի Neuralink ընկերությունը նախատեսում է հաջորդ մեկ տարվա ընթացքում մարդու ուղեղում ներդնել առաջին չիպը, որը կարող է ամբողջովին կույր մարդկանց տեսողությունը վերականգնել։ Այս մասին Մասկը հայտնել է Fox News հեռուստաալիքին տված հարցազրույցում։

Ձեռներեցը նշել է, որ Blindsight անունով սարքը ուղղակիորեն փոխազդելու է ուղեղի տեսողական կեղևի հետ։ Ընկերությունը հույս ունի հաջորդ 12 ամիսների ընթացքում զգալի առաջընթաց արձանագրել այս ուղղությամբ։

Մասկի խոսքով՝ Neuralink-ն ունի նաև մի շարք այլ մշակումներ։ Օրինակ՝ ապագայում ընկերությունը կարող է օգնել ողնաշարի վնասվածքներ ունեցող հիվանդներին կրկին քայլելու ունակություն ձեռք բերել։

Նշենք, որ ապրիլի վերջին Իլոն Մասկը հայտարարել էր, որ հաջորդ հինգ տարիների ընթացքում վիրաբուժական ռոբոտները կկարողանան փոխարինել մարդկանց։