2027թ ամռանը Երևանում անցկացվելիք 10–րդ Ֆրանկոֆոնյան խաղերին ըմբշամարտը ներառված չէ: Այդ մասին «Ֆեյսբուքի» իր էջում գրել է օլիմպիական խաղերի արծաթե մեդալակիր, Եվրոպայի ու աշխարհի չեմպիոն, ԱԺ նախկին պատգամավոր («Քաղաքացիական պայմանագիր» խմբակցություն) Արսեն Ջուլֆալակյանը։
Ջուլֆալակյանը նշել է, որ խաղերին սպասվում է շուրջ 4000 մասնակից, ավելի քան 50 պատվիրակություն։
Հայկական կողմը ներկայացնողները, որի պատասխանատուն ՀՀ վարչապետի աշխատակազմի ղեկավար Արայիկ Հարությունյանն է, Ֆրանկոֆոնյան խաղերի կազմկոմիտեին առաջարկել են ներառել աթլետիկա, պարաաթլետիկա, բրեյքդանս, ծանրամարտ, բասկետբոլ 3x3, սայլակով բասկետբոլ, ֆուտբոլ, շախմատ, ձյուդո, սեղանի թենիս մարզաձևերը։
Այս ցանկի մեջ բացակայում է երկրի առաջատար մարզաձևերից ըմբշամարտը:
«Բնականաբար, դա զարմացրել է մասնակից պետություններին, որոնցից շատերում ըմբշամարտը առաջատար դիրքերում է: Նաև փորձում են հասկանալ, թե ինչո՞ ւէ ընդունող կողմը կամավոր հրաժարվում մի մարզաձևից, որտեղ ամենից շատ մեդալներ կարող է նվաճել»,– իր զարմանքն է արտահայտել Եվրոպայի ու աշխարհի չեմպիոնը։
Նա կոչ է արել ակտիվորեն անդրադառնալ այս հարցին և ջանք գործադրել՝ ըմբշամարտը վերադարձնելու խաղերի ցանկ, քանի դեռ ուշ չէ:
Որպես իր խոսքի հիմնավորում, Ջուլֆալակյանը նշել է, որ միջազգային նման խաղերին ընդունող երկիրը կարող է առաջարկել իր համար առաջնահերթություն ունեցող մարզաձևերի ցանկ: Հիմնականում դրանք լինում են այն մարզաձևերը, որոնցում տվյալ երկիրն ուժեղ է: