Սննդամթերքի անվտանգության տեսչական մարմնի ղեկավար Տիգրան Պետրոսյանն անդրադարձել է Հայաստանից Ռուսաստան ծաղիկների արտահանման հետ կապված խնդրին։
Լրագրողների հետ զրույցում Տիգրան Պետրոսյանը, պարզաբանելով իրավիճակը, ասել է՝ Ռուսաստանը հստակ ուզում է, որ բուսասանիտարական ապրանքները, որոնք ներկրվում են իր երկիր, լինեն իր ստանդարտներին համապատասխան։
Պետրոսյանի խոսքով՝ սա նորմալ պահանջ է, և դա նորմալ է ամբողջ աշխարհում։
«Պայմանները բոլորի համար նույնն են։ Կա ռուսական շուկան, որտեղ մենք ուզում ենք արտահանել, և որը գուցե մեր արտադրողների համար ավելի նպատակահարմար շուկա է, բայց կան բազմաթիվ խնդիրներ, որոնք մենք քննարկեցինք արտադրողների հետ. դա կապված է հիվանդությունների, վնասատուների հետ։ Մենք բացատրել ենք, որ այսուհետև ստուգում անցնելուց հետո տրվելու են բուսասանիտարական սերտիֆիկատներ։ Դա նորմալ պահանջ է, նորմալ պայման»,- նկատել է Պետրոսյանը:
Անդրադառնալով հարցին, թե ինչո՞ւ երկար տարիներ որևէ խնդիր չի եղել, այժմ նոր խնդիրներ են առաջացել. ՍԱՏՄ ղեկավարը մանրամասնել է, որ խնդիր կարող էր ի հայտ գալ 10 ամիս առաջ կամ 10 ամիս հետո։
«Անհայտ ծագման ընկերությունների վրա մեր արտադրողները ապրանք են արտահանել տարիներ շարունակ։ Իրենք՝ բոլորը, դա գիտեն, բոլորը ընդունեցին։ Մի օր ընդունող կողմն ասել է՝ ինչքա՞ն պետք է այսպես լինի, բավարար է։ Այսինքն՝ մենք արտահանում ենք մի X կազմակերպության վրա ապրանք, որը իրականում տեղյակ չէ, որ ինքը որպես ընդունող կողմ ստանում է նմանատիպ ապրանք։ Ռուսական կողմի ֆիտոսանիտարական ծառայությունը գնում է տվյալ կազմակերպության մոտ, ասում՝ խնդրում եմ ներկայացրեք ձեր փաստաթղթերը, դուք այսքան ապրանք եք ստացել։ Այդ մարդը հաղորդում է տալիս, ասում է՝ ես բացառապես տեղյակ չեմ նման բաներից, ես նավթ վերամշակող կազմակերպություն եմ։ Այս պատմությունը միակը չէ, մենք ունենք բազմաթիվ նման նամակներ»,- ասել է Պետրոսյանը։
Նա հավելել է, որ պայմանավորվել են տնտեսվարողների հետ գնալ հետևյալ ճանապարհով. կան մարզային կենտրոններ, բոլոր մարզային կենտրոնի բուսասանիտարները արագացված տեմպերով կմտնեն կանեն աուդիտ ջերմոցներում։
«Որտեղ կլինեն խնդիրներ, ֆիտոսանիտարական սերտիֆիկատ չի տրվի, որը նորմալ է ամբողջ աշխարհում։ Որոնց մոտ չեն հայտնաբերվի հիվանդություններ, մենք ամեն օրվա ռեժիմով իրենց նամակ ենք գրելու, խնդրենք, որ հաստատեն, հաստատումից հետո ամեն օրվա ռեժիմով ինչ-որ մի խմբաքանակի (ծավալից կախված) լուծում ենք գտնելու։ Պայմանավորվածությունը եղել է հստակ. ֆիտոսանիտարական սերտիֆիկատները տրվելու են, քանի որ մենք ենք երաշխավորել, չնայած մեծ հաշվով մեր գործը չէ, բայց վերցրել ենք նման պատասխանատվություն, ֆիտոսանիտարական սերտիֆիկատը կտրվի, մինչև վերջնական փակած, կնքած չներկայացվի կառույցին, հաջորդը չի տրվելու։ Բոլորը եկել են համաձայնության»,- մանրամասնել է նա։
Նշենք, որ մի քանի օր է՝ ծաղիկ արտադրողները դժգոհում են, որ չեն կարողանում ապրանքը ուղարկել ՌԴ: Նրանք, ի նշան բողոքի, որոշ փչացած ծաղիկներ նետել են փողոցում: Վերջիններիս հետ հանդիպել է ՍԱՏՄ ղեկավարությունը: