Մեծամորը ոչ միայն հայկական լեռնաշխարհի,այլ նաև ողջ հին Մերձավոր Արևելքի մ.թ.ա. V- VI հազ. առավել ուսունասիրված եզակի հնագիտական հուշարձաններից մեկն է: Համարվում է տարածաշրջանի ամենանշանավոր բրոնզեդարյան բնակավայրերից։ Այստեղ պեղվել են բնակավայրի, ամրոցի, տաճարների և դամբարանադաշտերի մնացորդներ, որոնք թվագրվում են մ.թ.ա. 4-րդ հազարամյակից մինչև ուշ միջնադար։

«Մեծամոր» պատմահնագիտական արգելոց-թանգարանն ունի հարուստ հավաքածու: Այստեղ ցուցադրվում են Մեծամորի պեղումներից հայտնաբերված հազարավոր արժեքավոր գտածոներ՝ գործիքներ, զենքեր, խեցեղեն, զարդեր, սեպագիր արձանագրություններ և շատ այլ խորհրդանշական իրեր։ Դրանք վկայում են, որ Մեծամորը եղել է հնագույն արհեստների, առևտրի և մշակույթի կենտրոն։

Առանձնահատուկ ուշադրության է արժանի պերճանքի ոսկե առարկաների առանձնացված սրահը: Հայկական լեռնաշխարհի առայժմ ամենավաղ ոսկե գտածոները վերաբերում են մ.թ.ա. երրորդ հազարամյակի առաջին կեսին և հայտնաբերվել են Մեծամորի ու Շենգավիթի վաղբրոնզեդարյան հուշարձաններում: Այստեղ ցուցադրված է նաև տարածաշրջանում պեղված առաջին ոսկյա զարդը, որը մեկ ու կես պտույտով ծամկալ է և հայտնաբերվել է 5-6 տարեկան մանկան հիմնահողային դամբարանում:

Թանգարանի տարածքից մայրամուտները հրաշալի են։ Այցելությունը հիանալի հնարավորություն է ոչ միայն պատմություն ուսումնասիրելու, այլ նաև գեղեցիկ միջավայրում ևս մեկ հիշարժան օր ունենալու համար:

«Մեծամոր» պատմահնագիտական արգելոց-թանգարան անվճար կարող եք այցելել՝

մայիսի 17֊ին, ժամը` 10:00-24:00֊ը,

մայիսի 18֊ին, ժամը` 10:00-18:00֊ը։