Հատկապես ամռանը մազերը խոցելի են: Շոգը, ուլտրամանուշակագույն ճառագայթները, ծովի աղը, փոշին կարող են զգալիորեն վատացնել մազերի վիճակը: Հայտնի վարսահարդար Գալինա Տոտորինան  «Արգումենտի ի ֆակտի» թերթի հետ զրույցում պատմել է փորձարկված կանոնների մասին, որոնք կօգնեն պահպանել մազերի առողջությունն ու գեղեցկությունը։ Անդրադարձել է նաև վնասակար սովորույթներին, որոնք միայն վատացնում են իրավիճակը:

7 կանոն իդեալական վարսահարդարման համար

Ամռան շոգին պարտադիր հետևեք դրանց, որպեսզի աշնանը գեղեցիկ գանգուրների փոխարեն չստանաք անկենդան, չոր խճճված մազեր:

Կանոն 1. Ամռանը պարտադիր օգտագործեք ջերմապաշտպան միջոցներ:

Ջերմապաշտպան սփրեյներն ու կրեմները մազի մակերեսին ստեղծում են բարակ թաղանթ, որը պաշտպանում է ոչ միայն արևից ու չոր, տաք օդից, այլև վարսահարդարիչից կամ գանգրացնող սարքերից: Ջերմապաշտպան միջոցները հատկապես ամռանը շատ կարևոր են, քանի որ ուլտրամանուշակագույն ճառագայթները քայքայում են կերատինը, մազերը դարձնում չոր, փխրուն, զրկում բնական փայլից: Առավել խոցելի են ներկված, գունաբացված և բարակ մազերը:

UV ֆիլտրերով միջոցները (սփրեյի, չլվացվող կոնդիցիոների տեսքով) կօգնեն չեզոքացնել այս ազդեցությունը՝ ստեղծելով պաշտպանիչ շերտ։

Կանոն 2. Եթե հանգստանում եք ծովում, լողալուց հետո անպայման լվացեք մազերը:

Ծովի աղը բյուրեղանում է մազի մակերեսին և արևի ազդեցությամբ ուժեղացնում է վնասումը, քայքայվում է լիպիդային շերտը: Ծովում լողալուց հետո անպայման առնվազն ողողեք մազերը քաղցրահամ ջրով, ավելի լավ է՝ շամպունի օգնությամբ, ապա կիրառեք խոնավեցնող կոնդիցիոներ:

Կանոն 3. Խուսափեք ձիգ հյուսերից ու մազերը հավաքելուց:

Շոգ եղանակը լավագույն ժամանակը չէ ձիգ սանրվածքի, հյուսերի համար, քանի որ մաշկը չի շնչում, ինչի հետևանքով մազերը չորանում են, իսկ հյուսի ներսում ստեղծվում է «ջերմոցային էֆեկտ», որի հետևանքով խախտվում է միկրոֆլորան, առաջանում է քոր, գրգռվածություն, կարող են ակտիվանալ թեփը առաջացնող սնկերը: Ձիգ հավաքած մազերը, ի դեպ, կարող են հանգեցնել մազաթափության։

Կանոն 4. Ընտրեք խոնավեցնող հատկություններով կամ առօրյա օգտագործման համար նախատեսված շամպուններ:

Ամռանը մազերը պահանջում են ավելի նուրբ մաքրում: Հարմար են շամպունները, որոնք պարունակում են խոնավությունը պահող բաղադրիչներ, օրինակ՝ գլիցերին, պանթենոլ, ալոէ և ունեն մեղմ pH: Սա թույլ է տալիս խուսափել ջրազրկումից և մաշկի թեփոտումից՝ պահպանելով մազերի փափկությունն ու առաձգականությունը:

Կանոն 5. Քնեք մետաքսե կամ սատինե անկողնում:

Մետաքսն ու սատինը ստեղծում են հարթ մակերես, որը չի առաջացնում շփում: Սա հատկապես կարևոր է ամռանը, երբ մազերը կարող են խոնավանալ և հեշտությամբ վնասվել: Նման գործվածքները օգնում են խուսափել փխրունությունից, խճճվելուց։

Կանոն 6. Հոգ տանել գլխի մաշկի առողջության մասին:

Շոգին մաշկի ճարպն ավելի ակտիվ է արտադրվում, իսկ փոշին ու քրտինքը ստեղծում են բարենպաստ միջավայր բակտերիաների համար: Ուստի պարբերաբար մաքրեք գլխի մաշկը, օգտագործեք մեղմ պիլլինգներ և տոնիկներ՝ հավասարակշռությունը վերականգնելու համար:

Կանոն 7. Նվազագույնի հասցրեք տաք սարքերի օգտագործումը:

Եթե անհրաժեշտ է ոճավորում՝ անպայման օգտագործեք ջերմապաշտպան միջոցներ:

Այսպես չի կարելի

Մազերի գեղեցկությունն ու առողջությունը կախված են ոչ միայն գենետիկայից ու խնամքից, այլև առօրյա սովորույթներից: Դրանցից ոմանք աննկատ վնասում են կառուցվածքը, վատացնում արմատների սնուցումը և արագացնում մազաթափությունը: Ուստի մեր փորձագետն առաջարկում է հրաժարվել հետևյալ վնասակար սովորույթներից.

Սովորույթ 1. Ծխել կամ գտնվել ծխողների մոտ:

Նիկոտինը նեղացնում է անոթները՝ վատացնելով մազի ֆոլիկուլների սնուցումը: Մազերը դառնում են չոր, փխրուն և սկսում են թափվել: Ընդ որում, կարևոր է ոչ միայն ինքներդ չծխեք, այլև չգտնվեք ակտիվ ծխողների մոտ, քանի որ պասիվ ծխելը նույնպես զգալիորեն վնասում է մազերը:

Սովորույթ 2. Սնվել ինչպես պատահի:

Ձեր սննդակարգում սպիտակուցների, B խմբի վիտամինների, երկաթի, ցինկի և ճարպաթթուների բացակայությունը կարող է զրկել օրգանիզմը մազերի համար անհրաժեշտ կերատինից: Սա ուղիղ ճանապարհ է դեպի մազերի բարակումն ու թափումը:

Սովորույթ 3. Անտեսել սթրեսը և քունը:

Սթրեսն ու անքնությունը բարձրացնում են կորտիզոլի մակարդակը, օրգանիզմում ակտիվանում են բորբոքային պրոցեսները, և մազերը զանգվածաբար սկսում են թափվել:

Սովորույթ 4. Մազերը լվանալ առաջին հանդիպած շամպունով:

Մազերի լվացման համար անհամապատասխան բաղադրությամբ միջոցները կարող են չորացնել գլխի մաշկը, առաջացնել ճարպ կամ քոր: Ընտրեք միջոց՝ ելնելով մաշկի տեսակից, ոչ թե մազերի երկարությունից: