Գերմանիայի իշխանությունները խոստովանել են, որ գերմանական զինված ուժերը դեռևս ի վիճակի չեն խոցել երկրի տարածքում գտնվող անօդաչու թռչող սարքերը։ Վերջին օրերին Գերմանիայի ողջ տարածքում արձանագրվում են անօդաչուների թռիչքներ ռազմավարական օբյեկտների վրայով՝ սկսած Հայդեի նավթամշակման գործարանից մինչև Ռոստոկի ռազմական օբյեկտներ ու «Airbus»-ի ձեռնարկություններ։ Որոշ դեպքերում խոսքը վերաբերում էր անօդաչուների ամբողջ խմբերի։ Որոշ սարքերի հետքեր տանում էին Բալթիկ ծովում գտնվող օտարերկրյա դրոշի ներքո նավարկող մի նավ, որը շարժվում էր Ռուսաստանի ուղղությամբ։ Գերմանիայի զինվորականները իրավունք չունեն խոցել անօդաչուներին, քանի որ երկրում չկա անօդաչուներից պաշտպանվելու ամբողջական համակարգ։ Բացի այդ, բնակեցված տարածքների վրայով կրակ բացելը վտանգավոր է՝ բեկորները կարող են վիրավորել մարդկանց։ Պաշտպանական համակարգը նոր է միայն ձևավորվում․ ՀՕՊ-ը, որը լուծարվել էր դեռևս 2010 թվականին, պետք է փաստացիորեն նորից ստեղծվի։ Ֆեդերալ ներքին գործերի նախարար Ալեքսանդեր Դոբրինդտը տեղի ունեցածը անվանել է «անհանգստացնող ազդանշան»։ «ԵՄ տարբեր երկրներում անօդաչուների թռիչքները առաջին հերթին միտված են անորոշություն ու ապակայունացում ստեղծելուն։ Ինչպես նաև առցանց ապատեղեկատվությունը, լրտեսությունը և սաբոտաժի փորձերը, դրանք հիբրիդային պատերազմի գործիքներ են», — նշել է իր հերթին Շլեզվիգ-Հոլշտայն նահանգի վարչապետ Դանիել Գյունտերը։ Սպառնալիքին արձագանքում են նաև դաշնակիցները։ «Newsweek»-ի տվյալներով՝ ԱՄՆ-ը Նորվեգիա է ուղարկում «P-8 Poseidon» պարեկային ինքնաթիռներ՝ ՆԱՏՕ-ի վերահսկողությունը Բալթիկյան երկրների օդային տարածքի վրա ուժեղացնելու համար։